Subodh Mohite: शिवसेनेचा माजी खासदार राष्ट्रवादीत; महाविकास आघाडीत चाललंय काय?

पुणे/ नागपूर: शिवसेना पक्षातून राजकीय प्रवास सुरू करणारे माजी केंद्रीय मंत्री सुबोध मोहिते यांनी शुक्रवारी राष्ट्रवादी काँग्रेसमध्ये प्रवेश केला. राष्ट्रवादीचे सर्वेसर्वा शरद पवार यांच्या उपस्थितीत पुणे येथे झालेल्या छोटेखानी कार्यक्रमात त्यांनी आपली नवी राजकीय वाट चोखाळली. ( Former Union Minister Subodh Mohite Joins NCP )

वाचा: काँग्रेसला वगळून पर्यायी आघाडी?; दिल्लीतील बैठकीवर पवार बोलले

विदर्भातून राष्ट्रवादी काँग्रेसमध्ये हळूहळू इनकमिंग सुरू झाले आहे. शहरात प्रशांत पवार, आभा पांडे, रविनिश पांडेय यांच्यासह अनेक कार्यकर्त्यांनी अलीकडेच पक्षात प्रवेश केला. सुबोध मोहिते यांच्या प्रवेशामुळे पक्षाला आणखी एक नेता मिळाल्याने शहर व ग्रामीण भागात बळ मिळेल, असा दावा त्यांच्या समर्थकांनी केला. सुबोध मोहिते राष्ट्रवादी काँग्रेसमध्ये प्रवेश करणार असल्याची चर्चा अनेक महिन्यांपासून सुरू होती. प्रदेशाध्यक्ष जयंत पाटील विदर्भ दौऱ्यावर असतानाही चर्चा होती. अखेर शुक्रवारी मुहूर्त निघाला. पक्षाध्यक्ष शरद पवार यांच्या उपस्थितीत पुण्यातील राष्ट्रवादी भवनात झालेल्या कार्यक्रमात त्यांनी राष्ट्रवादीचा झेंडा हाती घेतला. यावेळी गृहमंत्री दिलीप वळसे पाटील उपस्थित होते. त्यांच्या प्रवेशाने काटोल क्षेत्रात माजी गृहमंत्री अनिल देशमुख यांच्यासह आता राष्ट्रवादीला दोन नेत्यांचे बळ मिळाले आहे.

वाचा: राज्यात तिसरी लाट कशी रोखणार?; सरकारने केल्या ‘या’ ८ महत्त्वाच्या सूचना

शरद पवार यांच्या अधिकृत ट्वीटर हँडलवरही सुबोध मोहिते यांच्या प्रवेशाची माहिती देण्यात आली आहे. पुणे शहरातील राष्ट्रवादी काँग्रेस पक्षाच्या नव्या कार्यालयाच्या उद्घाटनाच्या मुहर्तावर विदर्भातील नेते माजी खासदार सुबोध मोहिते यांनी त्यांच्या सहकाऱ्यांसह राष्ट्रवादी काँग्रेस पक्षात प्रवेश केला असून त्यांच्या पक्षप्रवेशाचे मी स्वागत करतो, असे पवार यांनी नमूद केले आहे.

सरनाईकांचे पत्र आणि मोहितेंचा राष्ट्रवादी प्रवेश

केंद्रीय तपास यंत्रणांच्या चौकशीच्या फेऱ्यात सापडलेले शिवसेना आमदार प्रताप सरनाईक यांनी टाकलेला लेटरबॉम्ब सध्या चर्चेत आहे. सरनाईक यांनी मुख्यमंत्री उद्धव ठाकरे यांना एक पत्र लिहून भाजप नेतृत्वाशी जुळवून घेण्याची विनंती केली आहे. याच पत्रात काँग्रेस आणि राष्ट्रवादी काँग्रेसवरही सरनाईक यांनी निशाणा साधला आहे. काँग्रेस आणि राष्ट्रवादीला त्यांचा मुख्यमंत्री हवा आहे. राष्ट्रवादीकडून शिवसेनेत फूट पाडण्याचा प्रयत्न सातत्याने होत आहे. शिवसेना कशी कमकुमवत होईल, यासाठी काम केले जात आहे, असा आरोपही या पत्रात करण्यात आलेला आहे. या पार्श्वभूमीवर शिवसेनेचा खासदार राहिलेला आणि केंद्रात मंत्री राहिलेला नेता राष्ट्रवादीत गेल्याने सगळ्यांच्याच भुवया उंचावल्या आहेत.

वाचा: महाविकास आघाडीत धुसफूस; कोल्हापूर ‘झेडपी’त राजकारण तापलं