आमदार पतीच्या निलंबनाविरोधात साधना महाजन पदर खोचून रस्त्यावर; मोर्चाचे केले नेतृत्व

म. टा. प्रतिनिधी, जळगाव: जळगाव जिल्ह्यातील जामनेर विधानसभा मतदारसंघाचे भाजपाचे आमदार गिरीश महाजन यांच्यासह १२ आमदारांचे काल विधानसभा अधिवेशनात गोंधळ घालून बेकायदा वर्तन केले म्हणून एक वर्षासाठी निलंबन करण्यात आले. या निलंबनाच्या विरोधात आज मंगळवारी जामनेर शहरात आमदार महाजन यांच्या पत्नी साधना महाजन यांच्या नेतृत्वाखाली मोर्चा काढून चक्काजाम आंदोलन करण्यात आले.

मुबंई येथे सुरु झालेल्या दोन दिवसीय विधानसभेच्या अधिवेशनात ओबीसींच्या राजकीय आरक्षणाच्या मुद्दयावरुन जोरदार गोंधळ झाला. या गोंधळात संतप्त विरोधकांनी वेलमध्ये जावून विरोध प्रकट करीत गोंधळ घातला. तालिका अध्यक्ष भास्कर जाधव यांचा माईक ओढण्यात आला. तसेच उपाध्यक्षांच्या दालनात देखील धक्काबुक्की व शिवीगाळ झाल्याचा आरोप जाधव यांनी केला. त्यावरुन गोंधळ घातल्याचा ठपका ठेवत भाजपाच्या १२ आमदारांना एका वर्षासाठी निलंबित करण्याचा ठराव विधीमंडळात पारीत करण्यात आला.

अनिल देशमुख यांच्या दोन्ही स्वीय सहाय्यकांच्या ‘ईडी’ कोठडीत वाढ

दरम्यान १२ आमदारांवर झालेली ही कारवाई अन्यायकारक व सुडबुध्दीने केल्याचा आरोप करीत भाजपाने महविकास आघाडी सरकारच्या विरोधात राज्यभर आंदोलन पुकारले. या निर्णयाच्या विरोधात निलंबित आमदारांमध्ये समावेश असलेल्या गिरीश महाजन यांच्या जळगाव जिल्ह्यातील जामनेर मतदारसंघात त्यांच्या पत्नी साधना महाजन या देखील पदर खोचून रस्त्यावर उतरल्यात. जामनेरात निषेध मोर्चाचे नेतृत्व साधना महाजन यांनी केले. जामनेर येथिल राघो मंगल कार्यालयापासून निषेध मोर्चा काढण्यात आला. नगरपालिकेच्या मुख्य चौकात चक्काजाम आंदोलन करीत महाविकास आघाडी सरकारचा निषेध केला. यावेळी महाविकास आघाडी सरकारची प्रतिकात्मक अंत्ययात्रा काढून तालिका अध्यक्ष भास्कर जाधव यांच्या प्रतिकात्मक पुतळ्याचे दहन देखील करण्यात आले.

गुन्हा केला नसेल तर सरकारने क्लीनचिट द्यावी; प्रताप सरनाईकांची मागणी

भाजपाच्या आमदारांचे निलंबन करण्याचा निर्णय अन्यायकारक व सुधबुध्दीने केल्याचा आरोप मोर्चेकऱ्यांनी केला आहे. या आमदारांचे निलंबन तात्काळ रद्द करावे अशी मागणीही यावेळी करण्यात आली. यावेळी अन्यायकारक कारवाई करणाऱ्या महाविकास आघाडी सरकारचा निषेध देखील नोंदविण्यात आला. यावेळी भाजपाचे तालुकाध्यक्ष चंद्रकांत बाविस्कर, गोविंद अग्रवाल, न.पा. गटनेते डॉ. प्रशांत भांडे यांच्यासह तालुक्यतील भाजप पदाधिकारी, कार्यकर्ते व नागरिक मोठ्या संख्येने सहभागी झाले होते.

करोनाच्या तिसऱ्या लाटेचा राळेगणसिद्धी असा करणार सामना