‘शिवाई’ला चढणार हिरवा साज; पर्यावरणपूरक बसचा रंग बदलण्याचा निर्णय

मुंबई : एसटीची हरित ऊर्जेची बस म्हणून ओळखल्या जाणाऱ्या ‘शिवाई’ला आता पर्यावरणीय साज मिळणार आहे. शून्य प्रदूषण करणारी ‘शिवाई’ हिरव्या छटांमध्ये रंगवण्याचा निर्णय एसटी महामंडळाने घेतला आहे. उन्हाळी सुट्टीच्या आधी म्हणजे मार्चमध्ये राज्यातील नागरिकांचा नव्या बसमधून प्रवास शक्य होणार आहे.

पांढरा, भगवा, जांभळा आणि हिरव्या रंगाचा वापर करून रंगवण्यात आलेली ‘शिवाई’ सध्या धावत आहे. विजेवर धावणारी ही बस पर्यावरणपूरक असल्यामुळे ती डोळ्यांना शीतलता देणाऱ्या हिरव्या रंगाच्या पुसट-गडद छटांनी रंगवण्यात येणार असल्याचे एसटीतील वरिष्ठ अधिकाऱ्यांनी सांगितले.

एसटी बसच्या रंगसंगतीत बदल करण्याचे, आणि गाड्यांचे रंग ठरवण्याचे अधिकार महामंडळाकडे आहेत. ‘शिवाई’ ही हरित ऊर्जेवर धावणारी असल्याने तिच्यासाठी हिरवा रंग निश्चित करण्यात आला आहे. हा रंग ‘शिवाई’ची ओळख ठरेल. फेब्रुवारीपासून या बस धावतील, असे महामंडळाचे व्यवस्थापकीय संचालक शेखर चन्ने यांनी सांगितले.

दादर-पुणे, ठाणे-पुणे, नाशिक-पुणे (शिवाजीनगर), औरंगाबाद-पुणे आणि कोल्हापूर-पुणे (स्वारगेट) या मार्गावर शिवाई धावणार आहे. दादर-पुणे आणि ठाणे-पुणे या प्रवासासाठी प्रवाशांना सुमारे ३५० आणि उर्वरित मार्गांसाठी अंदाजे ५०० रुपये प्रवाशांना मोजावे लागणार आहेत. पुणे-अहमदनगर मार्गावर पहिली शिवाई धावत आहे.

रंग ही एसटीची ओळख

एसटीच्या बसगाड्या रंगावरून ओळखल्या जातात. लालपरी (साधी बस) लाल रंग, निमआराम पांढरा आणि छताचा हिरवा रंग, शिवनेरीला निळा रंग, अश्वमेधला भगवा, शिवशाही घोड्यांचे ग्राफीक असलेला पांढरा रंग अशी या गाड्यांची ओळख आहे. यातच आता ‘शिवाई’ हिरव्या रंगाच्या छटांनी ओळखली जाणार आहे.

मार्चअखेर १५० बस

सार्वजनिक वाहतूक व्यवस्थेत विद्युत वाहनांचा वापर वाढवण्याचे केंद्र सरकारचे धोरण आहे. यानुसार महामंडळाने ‘शिवाई’ ही बस सुरू केली आहे. फेम-२ योजनेंतर्गत एकूण १५० बस मार्चअखेर महामंडळात दाखल होणार आहेत.