विद्यार्थिनींना पॉर्न व्हिडिओ दाखवणारा शिक्षक २ वर्षांपासून करत होता विकृत चाळे; नराधमाला पाठीशी घालणारा मुख्याध्यापकही रडारवर

कोल्हापूर : शाळेतल्या विद्यार्थिनींशी अश्लील वर्तन करणाऱ्या विजयकुमार परशुराम बागडी ( वय – ५२, मुळ गाव सोळांकुर, तालुका- राधानगरी) या शिक्षकाला पोलिसांनी ताब्यात घेतले आहे. त्याच्यावर गुन्हा दाखल करण्याचे काम सुरू आहे. पीडित मुलींनी आपल्या पालकांकडे याबाबत तक्रार केल्यानंतर हा सर्व प्रकार उघड झाला होता. मात्र, शाळेची आणि गावची प्रतिष्ठा जपण्यासाठी येथील मुख्याध्यापकांनी संबंधित शिक्षकाची सातारा जिल्ह्यात बदली करत घडलेल्या प्रकारावर पडदा टाकण्याचा प्रयत्न केला होता. यामुळे आता सदर शिक्षकासह मुख्याध्यापकावरही कारवाई होणार असल्याचे पोलीस अधीक्षक शैलेश बलकवडे यांनी सांगितले.

संशयित शिक्षकाला घेतले ताब्यात

राधानगरी तालुक्यातील शेळेवाडी येथील विवेकानंद शिक्षण संस्थेच्या विद्यालंकार या शाळेत नववी आणि दहावीमध्ये शिकणाऱ्या विद्यार्थिनींना शिक्षक विजयकुमार परशुराम बागडी हा इंग्रजी विषय शिकवायचा. शिक्षक बागडी हा पॉर्न व्हिडिओ दाखवून गेल्या २ वर्षांपासून विद्यार्थिनींसोबत गैरवर्तणूक करत असल्याचा धक्कादायक प्रकार घडला होता. या प्रकरणानंतर येथील मुली या प्रचंड तणावाखाली होत्या. अखेर घडलेला प्रकार त्यांनी आपल्या आई-वडिलांना सांगितल्यानंतर पालकांनी मुख्याध्यापकांकडे तक्रार केली.

गावाची आणि शाळेची प्रतिष्ठा राखण्यासाठी मुख्याध्यापक आणि सरपंच यांच्याकडून सदर शिक्षकाची बदली ही सातारा जिल्ह्यात करत घडलेले प्रकरण दाबण्याचा प्रयत्न करण्यात आला होता. मात्र त्यानंतर समुपदेशन करण्यासाठी गेलेल्या गीता हसुरकर यांना पीडित मुलींनी घडलेल्या प्रकाराची माहीती दिली आणि मुलींच्या धाडसामुळे या प्रकरणाला वाचा फुटली. सगळीकडे बातमी प्रकाशित झाल्यानंतर शाळेच्या मुख्याध्यापकांनी पोलीस ठाण्यात तक्रार दाखल केली. याप्रकरणी त्वरित पावले उचलत पोलिसांनी आता मुख्याध्यापकांची व पीडित मुलींची चौकशी करत संशयित शिक्षक विजयकुमार परशुराम बागडी याला सातारा जिल्ह्यातून ताब्यात घेतले आहे. त्याच्यावर सध्या गुन्हा नोंद करण्याचे काम सुरू आहे. त्याच्यावर कठोर कारवाई होणार असल्याचे पोलीस अधीक्षक शैलेश बलकवडे यांनी सांगितले. तसेच हे प्रकरण दाबण्याचा प्रयत्न करणाऱ्या मुख्याध्यापकासह संबंधितांवरही कारवाई होणार असल्याचे बलकवडे यांनी सांगितले.

मुलींच्या खिशात हात घालून अश्लील चाळे; वर्गात पॉर्न व्हिडीओ दाखवले; कोल्हापुरात धक्कादायक प्रकार

मुलींशी अश्लील वर्तन

शाळेत दहावीच्या वर्गात शिकणाऱ्या मुलींना हा शिक्षक पॉर्न व्हिडिओ दाखवायचा. विद्यार्थिनींच्या खांद्यावर हात टाकत, खिशात हात घालण्यासारखे गैरकृत्य करत होता. हा शिक्षक दोन वर्षांपासून हे गैरकृत्य करत असल्याचे पीडित मुलींनी समुपदेशना वेळी सांगितले. असे असले तरी मुख्याध्यापक आणि गावच्या सरपंचने हे प्रकरण दाबण्याचे प्रयत्न केले. शिक्षकाची बदली सातारा जिल्ह्यात केली. मात्र तेथे जाऊन देखील हा शिक्षक तेथील मुलींची असाच गैरकृत्य करेल म्हणत पीडित मुलींनी त्याच्यावर कारवाई व्हावी, अशी मागणी केली. यामुळे प्रकरण दाबण्याचा प्रयत्न करणाऱ्या संबंधितांवर देखील कारवाई करू असे पोलीस अधीक्षक शैलेश बलकवडे यांनी सांगितले. तर दुसऱ्या बाजूला शिवसेनेच्या ठाकरे गटानेही पोलीस अधीक्षकांना निवेदन देत सदर शिक्षकावर कठोर कारवाई करण्याची मागणी करण्यात आली आहे.

कर्ज फेडा अन्यथा वेश्या व्यवसाय करायला लावू, सावकाराची महिलांना धमकी, कोल्हापुरात