इतका राग बरा नव्हे वने! ओंकार भोजनेला लग्नात न बोलवल्याने वनितावर नेटकरी नाराज; म्हणाले-

मुंबई- ‘महाराष्ट्राची हास्यजत्रा’ या कार्यक्रमातून आपल्या विनोदाने प्रेक्षकांना खळखळून हसवणारी लोकप्रिय अभिनेत्री वनिता खरात सध्या सोशल मीडियावर चर्चेत आहे. तिने आपल्या हटके शैलीने प्रेक्षकांची मनं जिंकली. आपल्या अभिनयाने सगळ्यांना प्रेमात पाडणारी प्रेक्षकांची लाडकी वनी नुकतीच लग्नबंधनात अडकली. तिने २ फेब्रुवारी २०२३ रोजी सुमित लोंढे याच्यासोबत लग्नगाठ बांधली. तिच्या लग्नाची सोशल मीडियावर प्रचंड चर्चा आहे. वनिताच्या लग्नाचे फोटो सोशल मीडियावर धुमाकूळ घालतायत. तिला वधूच्या रूपात पाहायला नेटकरी उत्सुक होते. तिच्या लग्नात हास्यजत्रेच्या टीमने एकच कल्ला केला. त्यांचे नृत्य करतानाचे फोटो आणि व्हिडिओ नेटकऱ्यांमध्ये व्हायरल झाले आहेत. मात्र या सगळ्यात नेटकऱ्यांना एक गोष्ट प्रकर्षाने जाणवली ती म्हणजे ओंकार भोजनेची अनुपस्थिती.

वनिताच्या लग्नात ‘महाराष्ट्राची हास्यजत्रा’ या कार्यक्रमातील एकूण एक कलाकार हजर होता. त्यांनी वनितासाठी छानसा परफॉर्मन्सदेखील दिला. मात्र नेटकऱ्यांना एक गोष्ट खटकली ते म्हणजे ओंकारचं लग्नाला न येणं. हास्यजत्रेमधे ओंकार आणि वनिता यांचे स्किट प्रेक्षकांना प्रचंड आवडायचे. त्यांची केमिस्ट्री प्रेक्षकांना खूप आवडायची. मात्र ओंकारने कार्यक्रम सोडला आणि सगळं समीकरण बदललं. वनिताच्या लग्नात ओंकार नाही हे अनेक नेटकऱ्यांनी कमेंट करत बोलूनही दाखवलं आहे. वनिताने त्याला बोलवलंच नाही का? ओंकार लग्नाला का आला नाही? वनिताचा त्याच्यावरचा राग अजूनही गेला नाही का? आम्हाला त्याला पाहायला आवडलं असतं, तुम्ही निदान मित्र म्हणून तरी त्याला बोलवायला हवं होतं, अशा अनेक प्रतिक्रिया नेटकऱ्यांनी दिल्या आहेत.

ओंकार न दिसल्याने अनेक नेटकरी नाराज झाले आहेत. वनिताच्या आयुष्याच्या या वळणावर आपल्या चांगल्या मित्राला न बोलावल्याबद्दल नेटकरी वनितावर नाखूष आहेत. ओंकार असता तर आम्हाला आनंद झाला असता असंही नेटकऱ्यांनी म्हटलं आहे. ओंकार वनिताच्या लग्नाला का आला नाही याचं कारण मात्र समोर आलेलं नाही.