Magh Purnima 2023 : ‘या’ शुभ योगात माघ पौर्णिमा, जाणून घेऊया माघस्नानाचा मुहूर्त, पूजा विधी महत्व आणि कथा

माघ पौर्णिमा पूजा विधी

माघ पौर्णिमेला सकाळी लवकर उठून कोणत्याही पवित्र नदीत स्नान करावे. नदीला देवी मानण्याची पद्धत आपल्याकडे आहे. त्यामुळे तिचे नमन करावे. तिला धूप-दीप-नैवेद्य अर्पण करावा. सूर्याला अर्घ्य द्यावे. यानंतर विष्णू देवतेच्या पूजेचा संकल्प सोडावा. दुपारी अन्नदान करावे. या दिवशी लाल तीळ दान करण्याला विशेष महत्त्व आहे. आजच्या दिवशी विष्णू देवाची पूजा केल्यामुळे त्यांची कृपादृष्टी आपल्यावर राहते, अशी मान्यता आहे.

माघ पौर्णिमेचे महत्व

माघ महिन्यातील पौर्णिमेला केलेल्या दानाचे विशेष महत्त्व आहे. या दिवशी वस्त्र, तीळ, अन्न, गूळ, पैसा, पांघरून, गाय इत्यादी दान केल्याने सुख-समृद्धी मिळते. या दिवशी पवित्र नद्यांमध्ये स्नान करून भगवान विष्णू आणि देवी लक्ष्मीची पूजा केल्याने सर्व समस्या दूर होतात आणि देवाची कृपा राहते. यासोबतच या तिथीला पितरांना अर्पण करून श्राद्धही केले जाते. या दिवशी केलेल्या स्नानाने सर्व पाप आणि क्रोध नष्ट होऊन सर्व रोग दूर होतात. पवित्र नदीत स्नान करायला जाणं शक्य नसेल तर घरीच गंगेचं नामस्मरण करून पाण्यात गंगाजल टाकून स्नान करावे.

पौर्णिमा तिथी प्रारंभ

– ४ फेब्रुवारी, शनिवार रात्री ९ वाजून २९ मिनिटे ते

पौर्णिमा तिथी समाप्ती

– ५ फेब्रुवारी, रविवार रात्री ११ वाजून ५८ मिनिटापर्यंत.

पौर्णिमा स्नान मुहूर्त

– ५ फेब्रुवारी, ५ वाजून २२ मिनिटे ते ६ वाजून १७ मिनिटापर्यंत.

भारतीय पंचांगानुसार, सूर्योदयाची तिथी मानण्याची प्राचीन परंपरा असल्यामुळे माघ पौर्णिमा ५ फेब्रुवारी २०२३ रोजी साजरी करावी, असे सांगितले जात आहे. तसेच या दिवशी मंगल तसेच शुभ कार्य करता येऊ शकतात. याशिवाय या दिवशी दान कार्य, व्रतपूजन करणे लाभदायक मानले गेले आहे.

माघ पौर्णिमा शुभ योग

माघ पौर्णिमेला सर्वार्थ सिद्ध सारखे महायोगासोबत रविपुष्य योग आणि विजय मुहूर्तासारखे शुभ योग तयार होत आहेत. यासोबतच आश्लेषा नक्षत्रात चंद्र, गुरु आणि शनि हे तिन्ही ग्रह आपापल्या राशीमध्ये उपस्थित राहतील. रविवारी पुष्य योग तयार होतो तेव्हा त्याला रवि पुष्य योग म्हणतात. या शुभ योगांमध्ये स्नान आणि दान केल्याने देवी लक्ष्मीची कृपा होते आणि प्रत्येक कार्य शुभ होते. यासोबतच माघ पौर्णिमेला आयुष्मान योग, वाशी योग, सुनफा योग देखील तयार होत आहेत, जे प्रत्येक कामात यश मिळवून देतात आणि जीवनात सुख समृद्धीचा मार्ग मोकळा करतात. माघ पौर्णिमेला तयार होणारे हे शुभ योग तुम्हाला प्रत्येक अडचणीतून मुक्ती देतात.

माघ पौर्णिमा कथा

स्कंधपुराणातील रेवाखंडात माघ पौर्णिमेचे महत्त्व सांगणारी एक कथा आढळते. नर्मदा नदीच्या किनाऱ्यावर वसलेल्या एका गावात शुभव्रत नामक ब्राह्मण निवास करत होता. त्यांना वेदांचे उत्तम ज्ञान होते. मात्र, पूजा विधी करण्यात त्यांचे मन रमेना. पैसा कमवण्यात ते नेहमी व्यस्त असत. मात्र, वृद्धावस्थेत पूजा विधी कर्म केले पाहिजे, असे त्यांना वाटू लागले. आयुष्यात काहीतरी पुण्य मिळावे, यासाठी ते नियमितपणे पूजा-विधी करू लागले. ‘माघे निमग्‍ना: सलिले सुशीते विमुक्‍तपापास्त्रिदिवं प्रयान्ति।।’ या श्लोकाचा त्यांनी जप सुरू केला. सलग नऊ दिवस या श्लोकाचा जप करून नर्मदा नदीत स्नान केले. यानंतर दहाव्या दिवशी त्यांनी आपल्या देहाचा त्याग केला. पैसे कमवण्याच्या नादात अनेक लोकांच्या भावना त्यांनी दुखावल्या होत्या. त्यांच्या वागणुकीचा त्रास अनेकांना झाला. मात्र, माघ महिन्यातील नऊ दिवस नर्मदा नदीत स्नान केल्यामुळे त्यांना पापातून मुक्ती मिळाली, अशी कथा आहे.