जागा बघायला आली नि कॉटेजवर घेऊन गेली, अलिबागमध्ये हनिट्रॅप, मुंबईत महिला जाळ्यात

रायगड : युवकांना हनीट्रॅपच्या जाळ्यात ओढून त्यांच्याकडून लाखो रुपयांची लूट करण्याचे प्रकार सुरू झाले आहेत. असाच एक प्रकार कोकणात रायगड जिल्ह्यात अलिबाग येथे घडला आहे. अलिबाग येथील तरुणाला आपल्या प्रेमाच्या जाळ्यात अडकवून त्याची व्हिडिओ क्लिप तयार केली. ब्लॅकमेल करुन पाच लाख रुपयांची खंडणी मागणाऱ्या एक महिला व पुरुषाला अलिबाग पोलिसांनी बेड्या ठोकल्या. अवघ्या चोवीस तासात फिल्मी स्टाईल सापळा रचून मुंबई येथून आरोपींना अटक केली आहे.

या घटनेतील फिर्यादी युवकाला अनेकदा संशयित आरोपी फोन करून पैशाची मागणी करीत होते. त्यामुळे तो मानसिक तणावात होता. ११ फेब्रुवारी रोजी फिर्यादीला फोन करून आरोपींनी पाच लाखांची रक्कम आणण्यासाठी सांगितले होते. त्यानुसार आरोपींना मुंबईत बोलावण्यात आले होते. पोलीसही साध्या वेषात त्याच्या आजूबाजूला पाळत ठेऊन होते.

जागा बघण्याच्या उद्देशाने आलेली महिला, जागा न बघता आपल्या सौंदर्याच्या जाळ्यात ओढून त्याला कॉटेजवर घेऊन गेली. तिथे दोघांनी मज्जा केली आणि तिथेच त्याचा घात झाला. मोहजाळात अडकलेल्या तरुणाकडे पाच लाखाची खंडणी मागून व्हिडिओ व्हायरल करण्याची धमकी दिल्याची घटना अलिबाग तालुक्यात घडल्यानंतर मोठी खळबळ उडाली. या प्रकरणी मांडवा सागरी पोलीस ठाण्यात गुन्हा दाखल झाला होता. जिल्हा पोलीस अधीक्षक सोमनाथ घाडगे यांनी या गुन्ह्याचं गांभीर्य लक्षात घेऊन तात्काळ पोलिसांना तपासाच्या सूचना दिल्या

अलिबाग पोलीस ठाण्याचे पोलीस निरीक्षक शैलेश सणस, मांडवा सागरी पोलीस ठाण्याचे सहाय्यक पोलिस निरीक्षक राजीव पाटील आणि पोलीस कर्मचारी यांनी आरोपींना पकडण्यासाठी सापळा रचला.

पाच लाख रुपये कुठे घेऊन यायचे, ते संशयित आरोपी धनश्री फिर्यादीला सतत फोन करून सांगत होती. अखेर चर्चगेट रेल्वे स्टेशनवर भेटायचे ठरले. त्यानंतर काही वेळाने महिलासुद्धा चर्चगेट रेल्वे स्टेशन येथे आल्याचे लक्षात आले. पोलीस पथके देखील त्यांच्या मागे जाऊन स्टेशन परिसरात सापळा रचून लक्ष ठेवून होती. चर्चगेट रेल्वे स्टेशन येथील परिसरात काही वेळानंतर संशयित महिला फिर्यादीला भेटून अज्ञात आरोपी येण्याची वाट बघण्याचे नाटक करू लागली. थोड्या वेळाने या महिलेचा भाचा तिथे आला. त्याने महिलेच्या सांगण्यावरून फिर्यादीकडून पैशांची पिशवी स्वीकारली. तो जाण्यास निघाला असता पोलिसांनी या दोघांना ताब्यात घेतले. त्यांच्याकडे चौकशी केल्यानंतर महिलेच्या भाच्याचा या गुन्ह्यात सहभाग नसल्याचे पोलिसांना लक्षात आले.

आईवरील अत्याचाराचा सूड, UPSC करणाऱ्याने पुण्यातील दाम्पत्याला संपवलं, एका दिवसात गूढ उकललं
त्यानंतर पोलीस पथकाने महिलेकडे अधिक चौकशी केल्यावर तपास करता महिलेने अलिबाग येथील राहणाऱ्या एका इसमाच्या सोबतीने हा गुन्हा केला असल्याची माहिती समोर आली. यावेळी तात्काळ तपास पथकाने तांत्रिक तपासाची मदत घेऊन पोयनाड पोलीस ठाणे हद्दीतील मौजे तळवडे ता. अलिबाग या गावात जाऊन गुन्ह्यातील आरोपीला तपासासाठी ताब्यात घेतले. दोन्ही आरोपींना गुन्ह्यात अटक करून त्यांच्याकडे पुढील तपास सुरू आहे.

शारीरिक आणि आर्थिक आरोग्य वाढवण्यासाठी तुम्हाला काय करावं लागेल?
रायगड जिल्हा पोलीस अधिक्षक सोमनाथ घार्गे, अपर पोलीस अधीक्षक अतुल झेंडे, अलिबागच्या उपविभागीय पोलीस अधिकारी सोनाली कदम यांच्या मार्गदर्शनाखाली पोलीस निरीक्षक शैलेश सणस, अलिबाग पोलीस ठाणे, मांडवा सागरी पोलीस स्थानकाचे सहाय्यक निरीक्षक राजीव पाटील, मांडवा सागरी पोलीस ठाण्याकडील पोसई डी. पी. खाडे, चेतन म्हात्रे, प्रशांत घरत, सुधीर पाटील यांच्या पथकाने हो मोठी कामगिरी फत्ते करत या प्रकरणाचा छडा लावला. दरम्यान तरुणांनी अशा हनीट्रॅपच्या जाळ्यात अडकू नका, असे आवाहन रायगड पोलिसांनी केले आहे.