लाखोंची उलाढाल, मर्सिडिजमध्ये फिरतात दोघं भाऊ; मुंबईत कसा सुरू झाला ‘मुच्छड पानवाला’चा व्यवसाय?

मुंबईः मुंबईतील प्रसिद्ध आणि हजारो लोकांचे आकर्षण असलेल्या मुच्छड पानवालावर मुंबई क्राइम बँचच्या अँटी नारकोटिक सेलने कारवाई केली आहे. ‘मुच्छड पानवाला’वर कारवाई होण्याची ही पहिलीच वेळ नाहीये. याआधीही एनसीबीने मुच्छड पानवालाला समन्स बजावत कारवाई केली होती. त्यामुळं मुच्छड पानवाला कोण आहे याविषयी जोरदार चर्चा रंगली आहे. तर, जाणून घेऊया संपूर्ण प्रकरण.

काय आहे संपूर्ण प्रकरण?

अमली पदार्थविरोधी विभागाने केलेल्या कारवाईत ‘मुच्छड पानवाला’ याच्याकडून १५ लाखांचा ई-सिगारेटचा साठा जप्त करण्यात आला आहे. खेतवाडी येथे असलेल्या दुकानातील गोदामात या मालाचा साठा करुन ठेवण्यात आला होता. एएनसीने केलेल्या कारवाईनंतर व्हीपी रोड पोलिसांनी गुन्हा नोंदवत मुच्छड पानवालाचा मालक शिवकुमार तिवारी याला अटक केली आहे. दरम्यान, यापूर्वीही २०२१मध्ये एनसीबीने ड्रग्ज प्रकरणात अटकेची कारवाई केली होती.

२०२१मध्येही करण्यात आली होती कारवाई

मुंबईतील ड्रग्ज प्रकरणात’ मुच्छड पानवाला’चं नाव समोर आलं होतं. ब्रिटनमधील एका अनिवासी भारतीय नागरिकाला एनसीबीने ताब्यात घेतलं होतं. त्याच्याकडून २०० किलो ड्रग्जदेखील जप्त करण्यात आले होते. त्याच्या चौकशीतून मुच्छड पानवालाचं नाव समोर आलं होतं. उच्चभ्रू गाहकांना ड्रग्ज पुरवत असल्याचा आरोप ‘मुच्छड पानवाला’वर होता. त्यानंतर त्याला अटकही करण्यात आली होती.

मुंबईतील प्रसिद्ध ‘मुच्छड पानवाला’च्या दुकानात मुंबई पोलिसांची धाड; सापडलं मोठं घबाड

कोण आहे मुच्छड पानवाला

दक्षिण मुंबईतील केप्स कॉर्नर या उच्चभ्रू वस्तीत ‘मुच्छड पानवाला’चे दुकान आहे. मोठेमोठे उद्योजक आणि व्यापारी अनेकदा या दुकानात येतात. या दुकानातील पान खाण्यासाठी मुंबईसह देश-विदेशातून आलेले लोकही रांगा लावतात. मुच्छड पानवालाच्या ग्राहकांची संख्या मोठी आहे. पर्यटकांसाठीही हे दुकान म्हणजे एक आकर्षण आहे.

१९७७ साली पंडित श्यामचरण तिवारी यांनी पानाची टपरी सुरू केली होती. त्यानंतर त्यांच्या दोन्ही मुलांनी त्यांना हातभार लावण्यास सुरुवात केली. आपल्या रुबाबदार मिशांमुळं तिवारी हे अल्पावधीतच स्थानिक लोकांमध्ये लोकप्रिय झाले. हळूहळू त्यांचा व्यवसायही तेजीत आला आणि त्यांचे ग्राहकही वाढू लागले. शिवकुमार तिवारी आणि जयशंकर तिवारी हे दोन भाऊ मिळून हे दुकान चालवतात. सहा-सहा महिन्यांसाठी ते दुकान सांभाळतात. दोन्ही भाऊ मर्सिडिज गाडीतून फिरतात. तर दक्षिण मुंबईतील करोडपतींच्या यादीत त्यांचे स्थान आहे.

मुंबईकरांचा प्रवास होणार हायटेक; मिठी नदीच्या पोटातून धावणार मेट्रो, अशी असतील स्थानके
मुच्छड पानवालाची स्वतःची वेबसाइट आहे. ऑनलाइन फूड पोर्टल्सकडून त्यांना ऑनलाइन ऑर्डर देखील येतात. आज ‘मुच्छड पानवाला’ रोजच्या रोज लाखोंची उलाढाल करतो. मोठ्या कार्यक्रमात व सोहळ्यात ‘मुच्छड पानवाला’कडून पान पुरवले जातात.