बैलगाडी शर्यत होणारच! गोपीचंद पडळकरांचं राज्य सरकारला आव्हान; पोलीस बंदुका आणि दंडुके घेऊन रस्त्यावर

सांगली : बंदी झुगारून शुक्रवारी झरे (ता. आटपाडी) येथे बैलगाडी शर्यत होणारच असल्याचे सांगत आमदार गोपीचंद पडळकर यांनी राज्य सरकारला आव्हान दिले आहे. शर्यतीसाठी राज्यभरातील भाजपचे आमदारदेखील उपस्थित राहणार असल्याची माहिती पडळकरांच्या समर्थकांकडून सोशल मिडीयाद्वारे पसरवली जात आहे. (gopichand padalkar challenge to the state government for a bullock cart race)

एकीकडे आमदार पडळकर शर्यतीच्या आयोजनावर ठाम असले तरी दुसरीकडे शर्यत होऊ नये यासाठी पोलीस प्रशासनही सज्ज झाले आहे. झरे परिसरात संचारबंदी जाहीर केली असून, संपूर्ण गावाला पोलिसांनी वेढा दिला आहे. यामुळे झरे गावाची स्थिती पोलिसांनी अफगानिस्तानसारखी केल्याचा आरोप पडळकरांनी केला आहे.

झरे परिसरात कडेकोट बंदोबस्त तैनात

आमदार गोपीचंद पडळकर यांनी बैलगाडी शर्यतीचे आयोजन केल्यापासून जिल्ह्यात पोलिस प्रशासन आणि आमदार पडळकर यांच्यात संघर्ष निर्माण झाला आहे. कोर्टाच्या आदेशाचे उल्लंघन होऊ नये यासाठी पोलिसांनी झरे परिसरात कडेकोट बंदोबस्त तैनात केला आहे.

शर्यत स्थळावरही पोलीस ठाण मांडून आहेत. झरे गावात जाणारे सर्व मार्ग बंद केले असून, गावाबाहेरील व्यक्तींना आत प्रवेश दिला जात नाही. यानंतरही गनिमीकाव्याने शर्यत होणारच अशी चर्चा झरे परिसरात सुरू आहे. पोलिसांनी कितीही बळाचा वापर केला तरी शर्यत पार पडेल, असे सांगत आमदार पडळकर यांनी राज्य सरकारला आव्हान दिले आहे.
दीपिका देशमुख यांनी शून्यातून उभारलं विश्व, लॉकडाऊन असतानाही शेकडो महिलांना ‘असा’ दिला रोजगार
बैलगाडी शर्यत हा कृषी संस्कृतीचा अविभाज्य भाग – पडळकर

शर्यत बद्दल माहिती देताना आमदार पडळकर म्हणाले, बैलगाडी शर्यत हा कृषी संस्कृतीचा अविभाज्य भाग आहे. यावर शेतकऱ्यांचे अर्थकारण अवलंबून आहे. राज्य सरकारच्या दुर्लक्षामुळे सुप्रीम कोर्टात सुनावणीच्या तारखा पडत नाहीत. यातून मार्ग काढण्यासाठी राज्य सरकार काहीच हालचाली करत नाही. राज्य सरकारला जागे करण्यासाठी बैलगाडी शर्यत होणार आहे. झरे गावासह परिसरात मोठ्या संख्येने पोलीस बंदुका आणि दंडुके घेऊन आले आहेत.

यामुळे परिसरात अफगाणिस्तानसारखी स्थिती निर्माण झाली आहे. दरम्यान, आमदार पडळकर यांच्या समर्थनार्थ भाजपचे काही आमदार झरे गावात दाखल होणार असल्याची माहिती सोशल मीडियाद्वारे पसरवली जात आहे. त्यांच्या स्वागताचे फलकही सोशल मीडियातून झळकवले जात आहेत. आमदार पडळकर यांनीही आक्रमक भूमिका घेतल्याने शुक्रवारी शर्यत होणार, की पोलिसांकडून पडळकर यांच्यावर कारवाई होणार? हे आता पहावे लागणार आहे. (gopichand padalkar challenge to the state government for a bullock cart race)
बैलगाडी शर्यतीचा वाद पेटला, गोपीचंद पडळकरांना पोलिसांची नोटीस