आता शिवसेना आमदाराची राणेंविरोधात प्रक्षोभक भाषा; कारवाईकडं लक्ष

हिंगोलीः मुख्यमंत्री उद्धव ठाकरे (Cm Uddhav Thackeray) यांच्यावर टीका करताना केंद्रीय मंत्री नारायण राणे (Narayan Rane) यांनी वापरलेल्या आक्षेपार्ह शब्दांमुळं राज्यातील वातावरण तापलं आहे. मुख्यमंत्र्यांबाबत आक्षेपार्ह वक्तव्य केल्याप्रकरणी त्यांच्यावर अटकेची कारवाई करण्यात आली होती. तर, आता एकीकडे राणेंवर टीका करताना शिवसेना आमदाराची जीभ घसरली आहे. हिंगोलीच्या सेनेच्या आमदारांनी नारायण राणेंवर जोरदार टीका केली असून याप्रकरणी भाजप कार्यकर्ते तक्रार दाखल करण्याच्या तयारीत आहेत.

नारायण राणेंनी मुख्यमंत्र्यांबाबत केलेल्या वादग्रस्त वक्तव्याचे पडसाद मंगळवारी राज्यभरात उमटले. आक्रमक झालेल्या शिवसैनिकांनी राणेंविरोधात गुन्हे दाखल केले आहेत. तसंच, राज्यात शिवसैनिक आणि भाजप कार्यकर्ते एकमेकांना भिडल्यानं मोठा तणाव निर्माण झाला होता. राज्यभरात दोन्ही पक्षांच्या कार्यकर्त्यांनी आंदोलन केलं.

वाचाः नारायण राणेंच्या अडचणीत वाढ; नाशिक पोलिसांकडून नोटीस

हिंगोलीचे शिवसेनेचे आमदार संतोष बांगर यांचा मात्र राणेंवर टीका करताना तोल घसरला त्यांनी थेट राणेंचा कोथळा बाहेर काढण्याची भाषा केल्यानं भाजप कार्यकर्तेही आक्रमक झाले आहे. ‘तू काय सांगतो कुठे यायचं. तुझ्या घरात येऊन तुला मारण्याची ताकद आमच्यामध्ये आहे. पोलिसांना जरा बाजूला करा. हा संतोष बांगर, शिवसेनेचा मावळा, छत्रपतीचा मावळा, तुला चारीमुंड्या येऊन चीत नाही केलं, तुझा कोथळा बाहेर नाही काढला तर संतोष बांगर असं नाव सांगणार नाही,’ अशा शब्दांत संतोष बांगर यांनी राणेंवर टीका केली आहे.

वाचाः ‘नारायण राणे हे महान किंवा कर्तबगार कधीच नव्हते’

संतोष बांगर यांच्या या वादग्रस्त विधानामुळं राज्यात वातावरण पुन्हा पेटण्याची शक्यता आहे. बांगर यांच्याविरोधात भाजप कार्यकर्ते गुन्हा दाखल करण्याच्या तयारीत असल्याची माहिती आहे.

वाचाः लढाईला तोंड फुटले…; राणेंविरोधात शिवसैनिक इतके आक्रमक का झाले?