Mumbai: मुंबईतील धक्कादायक घटना; पाण्याने भरलेल्या बादलीत बुडून चिमुकल्याचा मृत्यू

मुंबई: आई किराणा सामान आणण्यासाठी गेली असता घरात खेळता खेळता बाथरूममध्ये गेलेल्या चार वर्षीय मुलाचा पाण्याने भरलेल्या बादलीत पडल्याने बुडून मृत्यू झाल्याची धक्कादायक घटना चेंबूरमध्ये घडली आहे. देवांश घाटविसावे असे मृत मुलाचे नाव असून याप्रकरणी चेंबूर पोलिसांनी अपमृत्यूची नोंद केली आहे. देवांशच्या अशा अपघाती मृत्यूने परिसरात हळहळ व्यक्त होत आहे. ( Mumbai Four Year Old Boy Drow )

वाचा:परमबीर सिंग यांनी मुख्यमंत्री निधीत जमा केले ५० हजार रुपये; कारण…

चेंबूरच्या मारोली चर्च येथील नालंदा नगर परिसरात देवांश आपल्या कुटुंबियांसह वास्तव्यास होता. सोमवारी दुपारी देवांशची आई उर्मिला घाटविसावे ही किराणा सामान आणण्यासाठी घराबाहेर पडली. यावेळी घरामध्ये देवांशसोबत उर्मिला यांचे सासरे आणि भाची होती. घरी परतल्यानंतर उर्मिला यांनी देवांशबद्दल विचारले असताना भाचीने तो वरच्या खोलीत झोपला असल्याचे सांगितले. उर्मिला यांनी खोलीत जाऊन पाहिले असता देवांश बेडवर दिसला नाही. आजूबाजूला कुठेच तो दिसत नसल्याने त्या बाथरूममध्ये गेल्या. बाथरूममधील पाण्याने भरलेल्या बादलीत देवांश डोक खाली आणि पाय वर अशा अवस्थेत आढळला. बेशुद्धावस्थेत असलेल्या देवांशला जवळच्या रुग्णालयात नेण्यात आले. मात्र, तिथे दाखल करण्यापूर्वीच डॉक्टरांनी त्याला मृत घोषित केले.

वाचा:धक्कादायक: पुण्यात पाणीपुरीवरून झालेल्या वादानंतर पत्नीची आत्महत्या

देवांश याच्या नाकामध्ये आणि तोंडामध्ये पाणी गेल्याने त्याचा मृत्यू झाल्याचे प्राथमिक वैद्यकीय अहवालातून स्पष्ट झाले आहे. कुटुंबियांचा देखील कुणावर संशय नाही. याप्रकरणात अपमृत्यूची नोंद करण्यात आल्याचे चेंबूर पोलिसांनी सांगितले.

वाचा:मुख्यमंत्र्यांसमोरच प्रताप सरनाईक म्हणाले, मी सर्वांना ऑक्सिजन देतो, पण…