Tej Police Times
गौतमी पाटीलच्या कार्यक्रमात राडा, अब्दुल सत्तार संतापले; आक्षेपार्ह भाषेत लाठीमाराचे आदेश
छत्रपती संभाजीनगर: वादग्रस्त वक्तव्य करुन वाद ओढवून घेण्यासाठी प्रसिद्ध असलेले राज्याचे अल्पसंख्याक मंत्री अब्दुल सत्तार पुन्हा एकदा वादात सापडले आहेत. अब्दुल सत्तार यांच्या वाढदिवसानिमित्त सिल्लोडमध्ये प्रसिद्ध नृत्यांगना गौतमी पाटील हिच्या कार्यक्रमाचे आयोजन करण्यात आले होते. यावेळी प्रेक्षकांनी कार्यक्रमात नेहमीप्रमाणे हुल्लडबाजी केली. यावेळी अब्दुल सत्तार यांच्या संतापाचा पारा चांगलाच चढला. त्यांनी स्टेजवर उभे राहत माईकवरुन हुल्लडबाजांना झापले. मात्र, यावेळी अब्दुल सत्तार यांनी वापरलेली शिवराळ आणि खालच्या थराची भाषा आता चर्चेचा विषय ठरत आहे. याठिकाणी उपस्थित असणाऱ्या पोलिसांना आदेश देताना सत्तार यांनी म्हटले की, ‘पाठीमागे उभ्या असलेल्या लोकांना इतकं मारा की, त्यांच्या #$% हाडं तुटली पाहिजेत. मारा त्यांना, हाणा त्यांना.’ यानंतरही पुढे बोलताना अब्दुल सत्तार यांनी समोर उपस्थित असलेल्या लोकांना झापताना आक्षेपार्ह भाषेचा वापर केला. त्यामुळे अब्दुल सत्तार पुन्हा एकदा वादात सापडले आहेत.
अब्दुल सत्तार यांच्या वाढदिवसानिमित्त सिल्लोड मतदार संघामध्ये अनेक कार्यक्रमांचे आयोजन करण्यात आले होते. बुधवारी याठिकाणी गौतमी पाटीलचा कार्यक्रम होता. या कार्यक्रमासाठी प्रचंड गर्दी झाली होती. कार्यक्रम सुरु होताच बसण्याच्या मुद्द्यावरुन प्रेक्षकांमध्ये वादावादी सुरु झाली, त्याचे रुपांतर हुल्लडबाजीत झाले. त्यावेळी अब्दुल सत्तार यांनी स्टेजवर येत हुल्लडबाजांना चांगलाच दम भरला. जे कार्यक्रम पाहण्यासाठी आले आहेत, त्यांनी शांत बसा. दुसऱ्या गटातून जे कार्यक्रमात गोंधळ घालण्यासाठी आले आहेत, त्यांना पोलिसांनी जेलमध्ये टाकावे. अब्दुल सत्तार यांच्या आदेशानंतर पोलिसांनी सौम्य लाठीमारही केला. मात्र, त्यापेक्षा अब्दुल सत्तार यांनी वापरलेली खालच्या दर्जाची भाषा हा सध्या चर्चेचा विषय ठरत आहे.
अब्दुल सत्तार यांच्या या वक्तव्यावर विरोधी पक्षनेते विजय वडेट्टीवार यांनी सडकून टीका केली आहे. महायुती सरकारची हीच संस्कृती हीच भाषा! मंत्री अब्दुल सत्तारांचे आभार मानतो जे त्यांनी महायुती सरकारचा खरा चेहरा स्वतः जनतेसमोर आणला. हजारोंच्या गर्दी सामोर पोलिसांना लाठीचार्ज करण्याचे तोंडी आदेश देऊन लोकांना फोडून काढायची भाषा वापरतात. महाराष्ट्र पोलीस दलातील जवानांना हे महायुतीतील मंत्री स्वतःच्या टोळीतील “गुंड” समजतात का ? सांस्कृतिक, सामाजिक, प्रबोधनाच्या नावाखाली कार्यक्रम घेऊन उपस्थितांच्या आई बापांवर अश्लील भाषेत टिपणी करत हजारो माता भगिनींना मान शरमेनं खाली घालायला लावणारे हे कसले मंत्री आणि हे कोणते प्रबोधनात्मक कार्यक्रम ?, असा सवाल वडेट्टीवार यांनी विचारला. यावर आता अब्दुल सत्तार काय प्रतिक्रिया देणार, याकडे सर्वांच्या नजरा लागल्या आहेत.