वैद्यकीय विद्यार्थ्यांचा नशेचा कारखाना; औषधांऐवजी ड्रग्जवर प्रयोग, चारकोपमधल्या चाळीत सापडलं घबाड

मुंबई : वैद्यकीय शिक्षण घेणाऱ्या तरुणाने कांदिवलीच्या चारकोप येथील एका चाळीत एमडी ड्रग्ज बनविण्याचा कारखाना थाटल्याची धक्कादायक बाब उघडकीस आली आहे. डार्क नेट आणि इतर वेबसाइटवरून माहिती मिळवून गुजरातहून आणलेल्या कच्च्या मालातून या कारखान्यात एमडी ड्रग्ज तयार केले जात होते. मालवणी पोलिसांनी दोघांना अटक करून एमडी ड्रग्ज आणि ते तयार करण्यासाठी लागणार कच्चा माल असे सुमारे एक कोटीपेक्षा अधिक किमतीचा ड्रग्जसाठा हस्तगत केला.

मालवणी पोलिसांनी काही दिवसांपूर्वी एमडी आणि थिनरसह अबरार शेख या तरुणाला अटक केली. शेख हा नशेसाठी या वस्तू विकत असल्याचे समोर आले. हा प्रकार गंभीर असल्याने मालवणी पोलिस ठाण्याचे वरिष्ठ निरीक्षक चिमाजी आढाव यांच्या मार्गदर्शनाखाली सहायक निरीक्षक निलेश साळुंखे, पाटील, बुगडे, राठोड, आव्हाड, शिंदे, वळतकर यांच्या पथकाने याबाबत खोलवर तपास सुरू केला. शेख याची कसून चौकशी केल्यानंतर त्याने हे ड्रग्ज नूर आलम चौधरी याच्याकडून घेतल्याचे समजले. मिळालेल्या माहितीच्या आधारे मालवणी पोलिसांनी चारकोप येथील इस्लाम कम्पाउंडमधील चाळीत छापा टाकला असता धक्कादायक चित्र समोर आले. पोलिसांनी नूर याला अटक करून त्याच्याकडून एक कोटीपेक्षा अधिक किमतीचा ड्रग्जसाठा हस्तगत केला.
बापानं पैशासाठी ३ वर्षाच्या मुलाला तेलगंणात विकलं; यवतमाळमधून टोळीला अटक
नूर आलम याने भाड्याने घेतलेल्या खोलीमध्ये प्रयोगशाळा आणि कारखाना सुरू केला होता. एमडी ड्रग्जसाठी वेगवेगळे फॉर्म्युले वापरून नूर प्रयोग करायचा. एखादा प्रयोग यशस्वी झाल्यास त्या आधारे एमडी ड्रग्जची निर्मिती करायचा. हा कारखाना पाहून पोलिसही अचंबित झाले.

झटपट पैशांसाठी

नूर याचे बारावीपर्यंत शिक्षण झाले असून त्याने बीएचएमएस या वैद्यकीय क्षेत्रात नुकताच प्रवेश घेतला होता. कांदिवली पश्चिम येथील संघवी इस्टेट परिसरात नूर कुटुंबासोबत राहत होता. वडील टॅक्सीचालक असून आई गृहिणी आहे. नूरला दोन भावंडे आहेत. तो सर्वांत मोठा असल्याचे पोलिसांनी म्हटले आहे. झटपट आणि कमी मेहनत घेऊन जास्त पैसे कमवता यावेत, यासाठी त्याने हा उद्योग सुरू केल्याचे तपासातून स्पष्ट झाले आहे.