मूर्तीला होतो सूर्यकिरणांचा अभिषेक, नागपुरातील राम मंदिराला अडीचशे वर्षांचा इतिहास

राम मंदिरात म्हैसूरच्या शिल्पकारांनी घडवलेल्या रामलल्लाची पाषाणमूर्ती होणार विराजमान
भगवंताच्या मूर्तीला सूर्यकिरणांचा अभिषेक, असे दृश्य विदर्भात कोणत्याही मंदिरात दिसत नाही, अपवाद उत्तर नागपुरातील या मंदिराचा. या प्राचीन मंदिराचे बांधकामच असे आहे की, रामनवमीच्या काही दिवस पूर्वीपासून उगवत्या सूर्याची किरणे थेट गाभाऱ्यात प्रवेश करून मूर्तीवर पडतात. आठ ते दहा दिवस हा सूर्यकिरणांचा अभिषेक होत असतो. हे दृश्य पाहण्यासाठी या काळात नागपूरकर भल्या सकाळी येथे गर्दी करीत असतात, अशी माहिती मंदिराचे डॉ. प्रवीण डबली यांनी दिली. विशेष म्हणजे अयोध्या येथील नव्याने होत असलेल्या मंदिरात सूर्यकिरणे प्रभू रामचंद्राच्या मूर्तीवर पडण्यासाठी तेथे आरसा बसविण्यात येणार आहे. मात्र, नागपुरातील या मंदिराचे बांधकामच तशा पद्धतीने करण्यात असल्याचे डबली यांनी सांगितले. मंदिराला लागून मोठा सभामंडप आहे. आवळा, बेल, पिंपळ, नारळ, औदुंबर हे धार्मिक कार्यात महत्त्व असणारे वृक्ष या परिसरात आहेत.

२२ रोजी सुंदरकांड

येत्या २२ जानेवारी रोजी अयोध्या येथील मंदिरात भगवान श्रीराम यांच्या मूर्तीची प्राणप्रतिष्ठा होणार आहे. त्यानिमित्त नागपुरातील या मंदिरावर आकर्षक रोषणाई करण्यात आली आहे. २२ तारखेला सकाळी येथे मूर्तीला दुग्धाभिषेक होईल. त्यानंतर सुंदरकांड पठण केले जाईल. सायंकाळी दीपोत्सव साजरा होणार आहे.

राम मंदिरात देवतांना आवाहन, अयोध्येत प्राणप्रतिष्ठेच्या विधींना सुरुवात