मराठा व खुल्या प्रवर्गाच्या सर्वेक्षणादरम्यान माहिती देण्यास नकार, दोन लाखांहून अधिक घरांतून टाळाटाळ

बहुसंख्य ओबीसींवर अन्याय होऊ देणार नाही त्यासाठी वाटेल ती किंमत मोजावी लागली तरी चालेल: छगन भुजबळ

२३ ते २८ जानेवारीपर्यंत एकूण २८ लाख ७ हजार ५१८ घरांचे सर्वेक्षण करण्यात आले. जवळपास ७२ टक्के सर्वेक्षण पूर्ण झाले. मात्र यामध्ये घर बंद असणे, सर्वेक्षणास नकार देण्याचेही प्रमाण आहे. एकूण सर्वेक्षणापैकी १९ लाख ६६ हजार ९२६ घरांचे सर्वेक्षण पूर्ण झाले असून हे प्रमाण ५०.७१ टक्के असल्याची माहिती मुंबई महापालिकेकडून देण्यात आली. तर २ लाख ६९ हजार ४९५ घरांनी सर्वेक्षणास नकार दिला. मराठा आरक्षणात सरसकट सर्व धर्मांचे सर्वेक्षण केले जात आहे. त्यामुळे अन्य धर्मीयांकडून माहिती देण्यास नकार देण्याचे प्रमाणही अधिकच आहे. तसेच काही वेळा या कामाचे परिपत्रक मागणे, मोठ्या प्रमाणात प्रश्नावली पाहता पुढील उत्तरे देण्यास टाळाटाळ केली जात आहे.

पाच लाखांहून अधिक घरे बंद

सर्वेक्षणासाठी जाणाऱ्या कर्मचाऱ्यांना काही घरे बंद असल्याचे निदर्शनास येत आहे. २८ लाख ७ हजार ५१८ घरांपैकी ५ लाख ७० हजार ९८४ घरे बंदच असल्याचे आढळले. त्यामुळे पालिका कर्मचाऱ्यांना माघारी परतावे लागले. सर्वेक्षणाचा कालावधी कमी असल्याने सर्वेक्षण करणाऱ्या कर्मचाऱ्यां लवकर अथवा सायंकाळी उशिरा सर्वेक्षणासाठी जाण्यास पालिकेने मुभा दिली आहे. त्यामुळे सर्वेक्षणास येणाऱ्या कर्मचाऱ्यांना सहकार्य करावे, तसेच ज्या घरांचे सर्वेक्षण पूर्ण होणार नाही, अशा लोकांनी जवळच्या विभाग कार्यालयात माहिती देण्याचे आवाहन मुंबई महापालिकेने या आधीच केले आहे. सर्वेक्षण ३१ जानेवारीपर्यंत सुरू राहणार असल्याने सुट्टीच्या दिवसांमध्येही सर्वेक्षण सुरू ठेवण्यात आले आहे. त्यामुळे पालिका अधिकारी, कर्मचारी घरोघरी सर्वेक्षणासाठी फिरत आहेत.