सरकारने जरांगेंपुढे मान तुकवल्याने ओबीसी आक्रमक, नगरला भुजबळांचा ओबीसी एल्गार मेळावा

ओबीसींची पहिली भव्य सभा

संयोजन समितीतर्फे सांगितले की, मराठा समाजाला आरक्षण देण्यासाठी ओबीसी समाजाचा विरोध नाही. परंतु ओबीसी समाजातून मराठा समाजाला आरक्षण देऊ नये. मराठा समाजाला स्वतंत्र वर्गातून आरक्षण द्यावे ही भूमिका ओबीसी समाजाची आहे. काही दिवसांपूर्वी मराठा आरक्षणाचा ड्राफ्ट राज्य सरकारकडून जाहीर झाल्यानंतर ओबीसी समाजात तीव्र असंतोष निर्माण झाला आहे. या पार्श्वभूमीवर नगरमध्ये ओबीसींची पहिली भव्य सभा होणार आहे. या मेळाव्यात ओबीसी नेते मार्गदर्शन करणार आहेत. ओबीसीमधून मराठा समाजाला आरक्षण न देता त्यांना स्वतंत्र आरक्षण द्यावे, अशी आग्रही मागणी ओबीसी समाजाच्या वतीने पुढे करण्यात येत आहे.

या मेळाव्याला नगर जिल्ह्यातून ओबीसी बांधव मोठ्या संख्येने येणार आहेत. या सभेसाठी स्वतंत्र पार्किंगची व्यवस्था करण्यात आली आहे. नगर शहरातील पार्किंगची व्यवस्था पांजरापोळ संस्थेचे मैदान, डॉ. बाबासाहेब आंबेडकर पुतळा जवळ, मार्केट यार्ड चौक, वायएमसी मैदान, खालकर हॉस्पिटल जवळ, अहमदनगर बॉईज हायस्कूल मैदान, कोठी रोड येथे करण्यात आलेली आहे.
सभेच्या ठिकाणी अप्लोपहार व पिण्याच्या पाण्याची व्यवस्था करण्यात आलेली आहे.

कै. बबनराव ढाकणे यांचे नाव प्रवेशद्वाराला

कै. बबनराव ढाकणे यांचे नाव प्रवेशद्वाराला देण्यात आले आहे. या मेळाव्यास चार ते पाच लाख ओबीसी समाज या मेळाव्याला उपस्थित राहणार असल्याचा अंदाज संयोजकांनी व्यक्त केला. तरी या महाएल्गार मेळाव्यासाठी ओबीसी समाजाने मोठ्या संख्येने उपस्थित रहावे असे आवाहन संयोजन समितीच्या वतीने करण्यात आलेले आहे.