गडचिरोलीत चाललंय तरी काय?; वाघाच्या हल्ल्यात आणखी एकाचा बळी

गडचिरोली: नरभक्षी वाघाचा बंदोबस्त करण्यासाठी काल गडचिरोली येथे ढोल बजाओ आंदोलन करण्यात आले. वाघाचा बंदोबस्त करण्यासाठी रॅपिड रेस्क्यू टीम जंगलात फिरत असताना या टीम ला हुलकावणी देत नरभक्षक वाघाने आरमोरी तालुक्यातील देलोडा खुर्द येथील एका शेतकर्‍याचा बळी घेतल्याची घटना आज १५ सप्टेंबर रोजी सकाळच्या सुमारास निदर्शनास आली. भीमदेव खोमाजी नागापुरे (६०) असे मृतकाचे नाव आहे.

गेल्या काही महिन्यापासून नरभक्षक वाघाने गडचिरोली व वडसा बनली भागातील गावांमध्ये अक्षरशः हैदोस घातला आहे. ११ सप्टेंबर रोजी गडचिरोली तालुक्यातील जेप्रा येथील गणपत भांडेकर यांचा बळी घेतला होता. त्यामुळे संतापलेल्या नागरिकांनी काल गडचिरोली वनवृत्त कार्यालयावर ढोल बजाव मोर्चा काढला होता. या आंदोलनाची दखल घेऊन वनविभागाच्या वतीने वाघाला बेशुद्ध करून जेरबंद करण्यासाठी प्रयत्न केले जात असतानाच वाघाने आणखी एकाचा बळी घेतला. भीमदेव नागापुरे हे बैल करण्यासाठी काल जंगलात गेले असता नरभक्षक वाघाने त्यांच्यावर झडप घालून त्यांना ठार केले. एवढेच नाही तर वाघाने त्यांच्या पोटापासून खालील पूर्ण भाग खाल्ला असल्याचे दिसून येत आहे.

जिल्ह्यात मानव आणि वन्यजीव यामध्ये संघर्ष वाढला असून वाघांच्या हल्ल्यात दिवसेंदिवस बळी जाणाऱ्या लोकांची संख्या वाढतच आहे. त्यामुळे संतापलेल्या नागरिकांनी विविध आंदोलने करून या वाघांचा बंदोबस्त करण्याची मागणी केली जात असतानाच आज आणखी एका शेतकऱ्याचा बळी गेला. आता या वाघांना जेरबंद करण्याचे वन विभागासमोर खूप मोठे आव्हान उभे टाकले आहे हे विशेष.

नवेगाव,नागझिरा येथील रॅपिड रेस्क्यू टीम नरभक्षक वाघाला बेशुद्ध करून त्याला पकडण्यासाठी मागील ७ तारखेपासून दिवस-रात्र प्रयत्न करीत आहे. ट्रॅप कॅमेरे लावून त्याठिकाणी पिंजरे लावण्यात आले आहेत. मात्र, वाघ पिंजऱ्यास हुलकावणी देत असल्याने सात दिवसानंतरही त्या वाघांना जेरबंद करण्यास वन विभागाला यश आले नाही.