Tej Police Times
१५ दिवसांच्या आत शरीरावरील टॅटू काढून टाका, ओडिशा पोलिसांचे विशेष सुरक्षा बटालियनला आदेश
वृत्तसंस्था, भुवनेश्वर : विशेष सुरक्षा बटालियन (एसएसबी) कर्मचाऱ्यांनी त्यांच्या शरीरावरील टॅटू १५ दिवसांच्या आत काढून टाकावे, असे ओडिशा पोलिसांकडून सांगण्यात आले आहे. भुवनेश्वरचे पोलिस उपायुक्त (सुरक्षा) यांनी मंगळवारी याबाबतचे आदेश दिले.
बटालियनमधील कर्मचाऱ्यांपैकी ज्यांच्या शरीरावर असे टॅटू दिसत आहेत, अशांची एक यादी तयार करावी असे सांगण्यात आले आहे. मुख्यमंत्र्यांचे निवासस्थान, राजभवन, राज्य सचिवालय, ओडिशा विधानभवन, उच्च न्यायालय या महत्त्वाच्या ठिकाणी विशेष सुरक्षा बटालियनचे कर्मचारी सुरक्षा पुरवितात, तसेच ओडिशामध्ये येणाऱ्या अतिमहत्त्वाच्या व्यक्ती, माननीय व्यक्ती आणि देशभरातून येणारे मान्यवर यांच्या सुरक्षेसाठी ‘एसएसबी’चे जवान तैनात असतात.
‘पथकातील बऱ्याच कर्मचाऱ्यांनी त्यांच्या अंगावर टॅटू काढले आहेत. हे टॅटू आक्षेपार्ह, अश्लील आणि अपमानास्पद असल्याने बटालियनची आणि ओडिशा पोलिसांची प्रतिमा मलीन होते. म्हणूनच आजपासून गणवेश परिधान केल्यावर दिसणारे टॅटू काढून घेण्यास परवानगी नाही, असा निर्णय घेण्यात आला आहे’, असे उपायुक्तांनी आदेशात म्हटले आहे. गणवेश परिधान केल्यावर ज्यांच्या शरीरावर टॅटू दिसतात त्यांनी येत्या १५ दिवसांत हे टॅटू कायमस्वरूपी काढून टाकावेत, असेही या आदेशात म्हटले आहे.