Tej Police Times
मुसळधार पावसाने दुबईला झोडपले, १२० मिमी पावसाची नोंद, शेजारील ओमान देशात १८ जणांचा मृत्यू
दुबई : संयुक्त अरब अमिरातीला मंगळवारी मुसळधार पावसाने झोडपले. यामुळे दुबईत अनेक महामार्गांवर पाणी साठल्याने नागरिकांना त्यांची वाहने रस्त्यावरच सोडून द्यावी लागली. शेजारच्या ओमान देशातही मुसळधार पावसामुळे पूर आला असून, मृतांची संख्या १८ वर गेली आहे.
दुबईत पावसाने जनजीवन विस्कळीत झाले असून, रस्त्यावर पाण्याची तळी साचली आहेत. वादळी वाऱ्यांमुळे दुबई विमानतळावरही हाहाकार माजला असून, अनेक विमाने जागीच थांबली. सायंकाळपर्यंत दुबईत १२० मिमी पाऊस झाला. दुबईतील शाळांनाही सुट्टी देण्यात आली. सरकारी कर्मचारीही घरीच राहिले. रस्त्यावरील पाणी काढण्यासाठी प्रशासनाने टँकर पाठवले. अनेक घरांमध्येही पाणी घुसले.
कोरडे वातावरण असलेल्या संयुक्त अरब अमिरातीमध्ये पाऊस फारसा पडत नाही. मात्र हिवाळ्यात थंड हवामानाच्या कालावधीत अधूनमधून पावसाच्या सरी पडतात. पावसामुळे पूरस्थिती उद्भवत नसल्याने अनेक रस्ते आणि अनेक भागांमध्ये सांडपाणी वाहून नेण्याची व्यवस्था नाही.
Kenya Floods: पुरामुळे केनियामध्ये तेरा जणांचा मृत्यू, पंधरा हजार नागरिक विस्थापित
बहारीन, कतार आणि सौदी अरेबियातही मुसळधार पाऊस झाला.
शेजारच्या ओमान देशामध्ये मुसळधार पावसामुळे मागील काही दिवसांत १८ जणांचा मृत्यू झाला आहे, अशी माहिती त्या देशाच्या आपत्कालीन यंत्रणेकडून देण्यात आली. यामध्ये एक गाडी वाहून गेल्याने १० शाळकरी मुलांसह एका प्रौढ व्यक्तीच्या मृत्यूच्या घटनेचा समावेश आहे.