दुबई तिसऱ्या दिवशीही पाण्यात, विमानतळावरील कामकाजही विस्कळीतच, एकाचा मृत्यू

वृत्तसंस्था, दुबई : वाळवंटी क्षेत्रातील संयुक्त अरब अमिरातीमध्ये मंगळवारी झालेल्या विक्रमी पावसामुळे दुबईसह अनेक ठिकाणी महत्त्वाच्या महामार्गांवर आणि रस्त्यांवर साचलेले पाणी गुरुवारी तिसऱ्या दिवशीही कायम होते. जगभरातील सर्वाधिक व्यग्र विमानतळ अशी ओळख असलेल्या दुबई विमानतळाच्या ‘टर्मिनल १’ वरून विमान उड्डाणे सुरू झाली असली, तरी कामकाज पूर्णपणे सुरळीत करण्यात गुरुवारीही यश आले नाही. या अतिवृष्टीमुळे देशात एकाचा मृत्यू झाला.‘दुबई विमानतळावरील उड्डाणे अद्याप विलंबाने; तसेच विस्कळित वेळापत्रकाने सुरू आहेत. त्यामुळे केवळ टर्मिनल१ वरच आणि कन्फर्म तिकीट असेल, तरच यावे,’ असे विमानतळाने ‘एक्स’ या मायक्रोब्लॉगिंग साइटवरून जाहीर केले.
उत्तर मध्य मुंबईत कोकणी माणसाला उमेदवारी द्यावी, ठाकरे गटाचं मत, काँग्रेसने शिलेदार हेरला

लांब पल्ल्याची उड्डाणे करणाऱ्या एमिरेट्स विमान कंपनीचे मंगळवारच्या वादळानंतर विस्कळित झालेले वेळापत्रक सुरळीत करण्याचे प्रयत्न सुरू होते. त्यामुळे अमिरातींमधून होणाऱ्या उड्डाणांसाठी चेक-इन करणे या कंपनीने थांबवले होते. रस्ते जलमय झाल्याने वैमानिक व अन्य कर्मचाऱ्यांना विमानतळापर्यंत पोहोचण्यात अडचणी येत असल्या, तरी गुरुवारी प्रवाशांना विमानतळावर प्रवेश देण्यास प्रारंभ करण्यात आला.

विमानतळावर उतरलेल्या प्रवाशांनी आपले सामान मिळण्यासाठी कित्येक तासांची प्रतीक्षा करावी लागल्याचे सांगितले. त्यामुळे अनेकांनी सामानाचा नाद सोडून आपल्या घराची किंवा हॉटेलची वाट धरली.

वाळवंटी कोरडे हवामान असलेल्या संयुक्त अरब अमिरातींमध्ये सामान्यत: वर्षाला सरासरी ९४ मिमी पाऊस पडतो. मात्र, मंगळवारी झालेल्या वादळामुळे दिवसभरात १४२ मिमी पावसाने दुबई विमानतळाच्या परिसराला झोडपले. देशाच्या अन्य भागांमध्ये याहून अधिक पाऊस पडला. त्यामुळे अनेक ठिकाणे, महामार्ग जलमय झाले.

अमिरातींमध्ये कृत्रिम पावसासाठी सुरू असलेल्या ‘क्लाउड सीडिंग’मुळे ही अतिवृष्टी झाल्याची चर्चा सुरू झाली होती. मात्र, अत्यंत अपवादात्मक असा कमी दाबाचा पट्टा निर्माण झाल्याने हे वादळ झाले आणि त्याचा इशारा आधीच देण्यात आला होता आणि केवळ ‘क्लाउड सीडिंग’ला यासाठी जबाबदार धरता येणार नाही, असे तज्ज्ञांनी सांगितले.

भारतीयांसाठी हेल्पलाइन

संयुक्त अरब अमिरातीमधील अभूतपूर्व पावसाच्या पार्श्वभूमीवर, तेथील भारतीय आणि अडकून पडलेले प्रवासी यांच्यासाठी भारतीय वकिलातीने हेल्पलाइन सुरू केली आहे. हवामानसंबंधी आपत्कालीन परिस्थितीत +९७१५०१२०५१७२, +९७१५६९९५०५९०, +९७१५०७३४७६७६ या क्रमांकावर संपर्क साधावा, असे कळवण्यात आले आहे.