रोहित वेमुला दलित नव्हता, पोलिसांचा ‘क्लोजर रिपोर्ट’मध्ये दावा; सर्व आरोपींना क्लीन चिट

वृत्तसंस्था, हैदराबाद : हैदराबाद विद्यापीठातील विद्यार्थी रोहित वेमुला हा दलित नव्हता आणि त्याने स्वत:ची खरी ओळख उघड होण्याच्या भीतीने आत्महत्या केली, असा दावा पोलिसांनी स्थानिक न्यायालयात क्लोजर रिपोर्टमध्ये केला आहे. या प्रकरणात आरोपींनाही क्लीन चिट देण्यात आली आहे. यात तत्कालीन कुलगुरू अप्पाराव पोडिले आणि हरियाणाचे राज्यपाल बंडारू दत्तात्रय यांचा समावेश आहे.

रोहित वेमुला या विद्यार्थ्याने २०१६मध्ये विद्यापीठातील वसतिगृहात आत्महत्या केली होती. त्यानंतर देशभर संतापाची लाट उसळली होती. त्यानंतर पोलिसांनी गुन्हा दाखल करून चौकशी सुरू केली होती. आठ वर्षांनी त्या प्रकरणात पोलिसांनी क्लोजर रिपोर्ट स्थानिक न्यायालयात सादर केला आहे. ‘रोहित वेमुला हा अनुसूचित जातीमधील नव्हता आणि त्याची कल्पना त्याला होती. अनेक समस्यांनी तो ग्रासला होता. त्यातूनच त्याने आत्महत्या केली असावी. त्याचबरोबर अनुसूचित जातीतील नसतानाही त्याच्या आईने त्याला जात प्रमाणपत्र मिळवून दिले होते.

यामुळे कधीतरी हे उघड होण्याची भीती त्याला होती; तसेच ही माहिती उघड झाली तर आजवर जे शिक्षण घेतले आहे ते वाया जाण्याची आणि गुन्हा दाखल होण्याचीही त्याला भीती होती,’असे पोलिसांनी अहवालात म्हटले आहे. खूप प्रयत्न करूनही आरोपींनी त्याला आत्महत्या करण्यास भाग पाडल्याचे पुरावे मिळू शकलेले नाहीत, असेही त्यात नमूद करण्यात आले आहे.