कॅनडात भीषण अपघात; ३ महिन्यांच्या नातवासह भारतीय जोडप्याचा मृत्यू, जागेवरच सोडला जीव

वृत्तसंस्था, टोरंटो : कॅनडाभेटीवर गेलेले भारतीय दाम्पत्य आणि त्यांच्या तीन महिन्यांच्या नातवाचा कॅनडामधील अपघातात मृत्यू झाला. पोलिस पाठलाग करत असलेल्या एका संशयित दरोडेखोराने चोरट्याने चुकीच्या दिशेने महामार्गावर प्रवेश करून वाहन चालवल्याने अनेक वाहनांची धडक होऊन हा अपघात झाला. अपघातात या तिघांसह चौघे जण जागीच मृत्युमुखी पडले.

टोरंटोच्या पूर्वेला ५० किलोमीटर अंतरावर व्हाइटबाय येथील महामार्ग ४०१वर येथे हा अपघात झाला. ओंटारियोच्या विशेष तपास पथकाने सांगितले की, अपघातातील मृतांपैकी एक ६० वर्षीय पुरुष आणि ५५ वर्षीय महिला हे दोघे भारतातून आले होते. मात्र त्यांची नावे पोलिसांनी जाहीर केली नाहीत. या अपघातात या भारतीय दाम्पत्याच्या तीन महिन्यांच्या नातवाचाही मृत्यू झाला. बाळाचे आई-वडीलही त्याच वाहनातून प्रवास करत होते. बाळाची आई गंभीर जखमी झाली असून त्यांना रुग्णालयात दाखल करण्यात आले आहे.

स्थानिक प्रसारमाध्यमांनी दिलेल्या वृत्तानुसार, वाहनांच्या धडकेत दरोडाप्रकरणातील २१ वर्षीय संशयित ठार झाला आहे. बोमनव्हिल येथे दारूच्या दुकानात दरोडा घातल्याच्या संशयावरून पोलिसांनी त्याच्या व्हॅनचा पाठलाग सुरू केला होता. महामार्गावर पोलिसांनी सुमारे २० मिनिटे त्याचा पाठलाग केला. पोलिसांचा ससेमिरा चुकवण्यासाठी या संशयिताने चुकीच्या दिशेने महामार्गावर प्रवेश केला. त्यावेळी समोरून येणाऱ्या वाहनाला धडकल्याने किमान सहा वाहनांचा अपघात झाला. सोमवारी झालेल्या या अपघातानंतर हा महामार्ग ४०१ अनेक तास बंद ठेवण्यात आला होता.
नवीन कार, पहिलं दर्शन बाप्पाचंच; पण परतीच्या वाटेवर नियतीने डाव साधलाच अन्…थरारक घटना
‘तो प्रसंग भयावह’

‘महामार्गावरून प्रवास करत असताना अचानक चुकीच्या दिशेने येणारी गाडी अचानक माझ्या कारसमोर आली. हा प्रसंग अत्यंत भयावह होता. मी जरी वाचले, तरी अन्य चौघांचा मृत्यू पाहणे दुर्देवी होते,’ असे या भीषण पाठलागाची साक्षीदार असलेल्या आणि सुदैवाने बचावलेल्या मिलिका माल्जकोविच बिर्केट यांनी सांगितले.