सुनीता विल्यम्स यांची अंतराळ मोहीम स्थगित, तांत्रिक बिघाडामुळे शेवटच्या क्षणी उड्डाण रद्द

वृत्तसंस्था, केप कॅनव्हेराल : प्रक्षेपकातील तांत्रिक बिघाडामुळे बोइंगला आपली पहिलीवहिली अंतराळ मोहीम सोमवारी रात्री (अमेरिकी प्रमाणवेळेनुसार) स्थगित करावी लागली. मूळ भारतीय वंशाच्या अंतराळवीर सुनीता विल्यम्स यांच्यासह बूच विल्मर या मोहिमेत सहभागी होणार होते. तांत्रिक समस्या दूर झाल्यास ‘स्टारलायनर’ अंतराळयान शुक्रवारपर्यंत अवकाशात झेपावू शकेल, असे ‘बोइंग’ने म्हटले आहे.

बोइंगचे ‘स्टारलायनर’ अंतराळयान फ्लोरिडा येथील केप कॅनव्हेराल येथून आंतरराष्ट्रीय अवकाश स्थानकाच्या दिशेने अवकाशात झेपावणार होते. भारतीय प्रमाणवेळेनुसार मंगळवारी सकाळी आठ वाजून चार मिनिटांनी हे उड्डाण होणार होते. यासाठी सुनीता व विल्मर यांनी उलटगणती संपल्यानंतर उड्डाणापूर्वी दोन तास या अंतराळयानाच्या कॅप्सूलमध्ये प्रवेश केला. मात्र, या अंतराळयानास घेऊन जाणाऱ्या अॅटलास प्रक्षेपकाच्या वरील भागातील झडपेत मोठ्या प्रमाणात बिघाड निर्माण झाल्याचे निदर्शनास आले. ‘ऑक्सिजनच्या दाबाचे नियमन करणारी ही झडप वारंवार उघडबंद होऊ लागली व त्यातून मोठा आवाजही येत होता,’ अशी माहिती ‘युनायटेड लाँच अलायन्स’चे सीईओ टोरी ब्रुनो यांनी दिली.

‘या झडपेचे आयुर्मान कदाचित संपले असल्याने हा बिघाड झाल्याची शक्यता आहे. ही झडप बदलावी लागल्यास ही मोहीम पुढील आठवड्यापर्यंत पुढे ढकलावी लागेल. मात्र, ती दुरुस्त होण्यायोग्य असल्याचा निर्वाळा अभियंत्यांनी दिल्यास व तशी दुरुस्ती झाल्यास शुक्रवारपर्यंत ही मोहीम मार्गी लागू शकेल,’ असेही ब्रुनो म्हणाले.
यशस्वी झाली ‘शेनझोऊ 17’ मोहिम; चीनचे तीन अंतराळवीर ६ महिन्यांनी अवकाशातून पृथ्वीवर परतले
यापूर्वीही बिघाड

बोइंगच्या या मोहिमेस नियोजनाच्या तुलनेत कमालीचा विलंब झाला आहे. यापूर्वीही विविध स्वरूपाच्या तांत्रिक बिघाडांमुळे ही मोहीम लांबली आहे. याशिवाय, बोइंग स्टारलायनरच्या मानवरहित अंतराळ मोहिमेस २०१९मध्ये अपयश आले होते.