मासळी विक्रेत्यांमध्येही स्वीप पथकाने केली मतदानाबाबत जनजागृती

ठाणे, दि. १२ (जिमाका): ठाणे लोकसभा निवडणुकीतील मतदानाची टक्केवारी वाढावी यासाठी स्वीपच्या माध्यमातून शहरात सर्वत्र मतदान जनजागृती करण्यात येत आहे. 147 कोपरी पाचपाखाडी विधानसभा अंतर्गत लोकमान्यनगर येथील पडवळ नगर व इंदिरानगर येथील मासळी बाजारातील मासळी विक्रेत्यांमध्ये मतदानाबाबत नुकतीच जनजागृती करण्यात आली.

मतदान हे आपले राष्ट्रीय कर्तव्य असून मतदानाचा अधिकार हा प्रत्येकाने बजावून लोकशाही बळकट करण्यासाठी आपला खारीचा वाटा उचलला पाहिजे. 20 मे 2024 ही मतदानाची तारीख लक्षात ठेवून आपले राष्ट्रीय हक्क बजावा असे आवाहन यावेळी मासळी विक्रेत्यांना करण्यात आले.

पडवळ नगर व इंदिरानगर येथील मासळी बाजारातील विक्रेत्यांनीही मी मतदान करणार अशा घोषणा दिल्या. मतदार राजा जागा हो… लोकशाहीचा धागा हो.. अशी जनजागृती स्वीपच्या माध्यमातून करण्यात आली. यावेळी स्विप टिमचे सहकारी श्री.राजेंद्र परदेशी श्री.रोहीत चेटोले , श्री.अनंत सोनावळे, श्री.अविनाश सावंत, श्री. सिताराम परब व श्री. नैनेश भालेराव उपस्थित होते.

०००