पोर्शे प्रकरणाची पुनरावृत्ती, भरधाव ऑडीची धडक; आजोबा काही फूट हवेत उडाले, थरकाप उडवणारा अपघात

नोएडा: पुण्याच्या कल्याणीनगरमध्ये भरधाव पोर्शे कारनं दुचाकीला धडक दिली. त्या अपघातात दोन तरुण अभियंत्यांचा मृत्यू झाला. आता तशीच घटना नोएडामध्ये घडली आहे. आलिशान ऑडी कारनं भरधाव वेगात सकाळच्या सुमारास एका वृद्धाला धडक दिली. ही घटना सीसीटीव्हीत कैद झाली आहे. अपघाताचा व्हिडीओ सोशल मीडियावर व्हायरल झाला आहे.

सीसीटीव्हीमध्ये संपूर्ण अपघात कैद झाला आहे. पांढऱ्या रंगाची ऑडी एका वृद्धाला धडक देताना दिसत आहे. धडक इतकी भीषण होती की वृद्ध हवेत काही फूट उंच उडाला आणि जमिनीवर आदळला. नोएडाच्या सेक्टर ५३ मधील कांचनजंगा अपार्टमेंट्सजवळ रविवारी सकाळी ११ च्या सुमारास हा अपघात झाला. जनक देव शहा असं मृत्युमुखी पडलेल्या वृद्धाचं नाव आहे. ते ६३ वर्षांचे होते. शहा सेक्टर ५३ चे रहिवासी होते. ऑडीनं भरधाव वेगात त्यांना धडक दिली. अपघातानंतर चालकानं कार तितक्याच वेगात दामटवली.
Pune Car Accident: ‘ती’ कार गिफ्ट दिलेली, आजोबांनी फोटो WhatsApp ग्रुपवर टाकलेला; मित्रानं गुपितं फोडली
ऑडीचा वेग अतिशय जास्त होता. त्यामुळे धडक बसताच शहा काही फूट हवेत उडाले. त्यांचा जागीच मृत्यू झाला. दूध आणण्यासाठी गेलेले शहा बराच वेळ घरी न परतल्यानं त्यांच्या कुटुंबियांनी त्यांचा शोध सुरु केला. काही वेळानं त्यांना शहांचा मृतदेह रस्त्याच्या मधोमध पडलेला दिसला. जनक शहांच्या मृत्यूमुळे कुटुंबावर दु:खाचा डोंगर कोसळला. त्यांनी या घटनेची माहिती पोलिसांना दिली.

पोलिसांनी घटनास्थळाची पाहणी करुन तपास सुरु केला. सेक्टर २४ च्या पोलिसांनी ऑडी कारच्या चालकाविरोधात गुन्हा दाखल केला. त्याची ओळख अद्याप पटलेली नाही. अपघाताचा व्हिडीओ सोशल मीडियावर व्हायरल झाला आहे. यात वृद्ध माणूस रस्त्यावर चालताना दिसत आहे. वृद्ध चालत असताना ऑडी कार त्याला मागून धडक देते. वृद्ध हवेत काही फूट फेकला जातो. यानंतर कार चालक तिथून फरार होतो. पोलिसांनी सीसीटीव्ही फुटेज ताब्यात घेतलं असून कार मालकाचा शोध सुरु आहे.