Fact Check : भाजपने प्रशांत किशोर यांना राष्ट्रीय प्रवक्ते केलं? व्हायरल होणाऱ्या पत्राचं सत्य काय?

नवी दिल्ली : निवडणुकांच्या रणधुमाळीत सोशल मीडियावर एक पत्र व्हायरल होत आहे. हे पत्र भाजपच्या राष्ट्रीय सरचिटणीसांनी जारी केल्याचं सांगण्यात येत आहे. भाजपचे राष्ट्रीय अध्यक्ष जेपी नड्डा यांनी माजी राजकीय रणनीतीकार आणि जन सुराज अभियानाचे संस्थापक प्रशांत किशोर यांची राष्ट्रीय मुख्य प्रवक्तेपदी नियुक्ती केल्याचा दावा व्हायरल झालेल्या पत्रात केला जात आहे. मात्र सोशल मीडियावर व्हायरल झालेल्या या पत्राचं भाजपने खंडन केलं आहे. न्यूज चेकरने या व्हायरल पत्राची सत्यता पडताळणी केली आहे.

काय केला जातोय दावा?

काही दिवसांपूर्वी एका मुलाखतीत प्रशांत किशोर यांनी दावा केला होता की, या लोकसभा निवडणुकीत भाजपला ३७९ जागा मिळणार नाहीत, मात्र भाजपला २७० पेक्षा कमी जागा मिळणार नाहीत. म्हणजेच भाजपचेच सरकार स्थापन होणार हे निश्चित आहे. प्रशांत किशोर यांच्या या दाव्यानंतर हे पत्र सोशल मीडियावर व्हायरल होऊ लागलं असून प्रशांत किशोर यांना भाजपचे राष्ट्रीय प्रवक्ते बनवल्याचा दावा केला जात आहे.

सोशल मीडियावर व्हायरल होत असलेलं हे पत्र भाजपचे राष्ट्रीय सचिव अरुण सिंह यांनी जारी केलं असून त्यावर २२ मे २०२४ ही तारीख लिहिली आहे. याशिवाय भाजपचे राष्ट्रीय अध्यक्ष जेपी नड्डा यांनी प्रशांत किशोर यांची भाजपचे राष्ट्रीय मुख्य प्रवक्ता म्हणून नियुक्ती केल्याचं व्हायरल पत्रात लिहिलं आहे.

कशी केली सत्यता पडताळणी?

प्रशांत किशोर यांच्याबाबत करण्यात येणाऱ्या दाव्याच्या पत्राची सत्यता तपासणी करण्यासाठी सर्वात आधी संबंधित कीवर्डच्या मदतीने गुगल सर्च करण्यात आलं. या दरम्यान असा कोणताही न्यूज रिपोर्ट आढळला नाही, ज्यात व्हायरल पत्रातील दाव्याचा उल्लेख करण्यात आला आहे.

यानंतर,व्हायरल पत्राची तुलना भाजपने जारी केलेल्या खऱ्या पत्राशी केली, तेव्हा काही फरक आढळले. फरक खालील चित्रात पाहिले जाऊ शकतात.

या पडताळणीवेळी प्रशांत किशोर यांच्या एक्स अकाऊंटवरुन करण्यात आलेलं ट्विट आढळलं. या ट्विटमध्ये त्यांनी हे पत्र फेक असल्याचं सांगितलं. जन सुराजने आपल्या ट्विटमध्ये एका व्हॉट्सअॅप चॅटचा स्क्रिनशॉट शेअर केला आहे. हे लेटर जयराम रमेश यांनी शेअर केलं आहे.
Fact Check:पश्चिम दिल्लीतून आप उमेदवार महाबल मिश्रा यांना RSS चं पत्र? जाणून घ्या सत्य
यावर प्रतिक्रिया देताना जन सुराजने लिहिलंय, तुम्ही सर्व खोट्या बातम्यांबद्दल बोलता. आता पाहा काँग्रेस पक्षाचे संपर्क प्रमुख जयराम रमेश यांनी कशाप्रकारे फेक पत्र शेअर केलं आहे.

त्याशिवाय भाजप प्रवक्ता जयवीर शेरगिल यांना याबाबत विचारलं असता त्यांनीही हे पत्र फेक असल्याचं सांगितलं. ते म्हणाले, असं काही घडलं असतं, तर त्याबाबतची माहिती आम्हाला संस्थेकडून नक्कीच मिळाली असती आणि ती भाजपच्या सोशल मीडिया अकाऊंटवरुन नक्कीच शेअर केली गेली असती. याशिवाय भाजपचे राष्ट्रीय सरचिटणीस अरुण सिंह यांनीही हा दावा खोटा असल्याचं म्हटलं आहे.

निष्कर्ष

वरील सर्व बाबींवरुन असं स्पष्ट होतं, की सोशल मीडियावर व्हायरल होणारं पत्र पूर्णपणे फेक, बनावट आहे. भाजपकडून अशाप्रकारचं कोणतंही पत्र जारी करण्यात आलेलं नाही.

(This story was originally published by News Checker, and republished by MT as part of the Shakti Collective.)