अ‍ॅमस्टरडॅमच्या विमानतळावर मृत्यूचा थरार; विमानाच्या इंजिनात अडकून एकाचा अंत; प्रवासी होता की कर्मचारी?

वृत्तसंस्था, ॲमस्टरडॅम : ॲमस्टरडॅममधील शिफोल विमानतळावर बुधवारी एक थरारक दुर्घटना घडली. एक व्यक्ती ‘केएलएम’ एअरलाइन्सच्या विमानाच्या इंजिनात अडकला व काही क्षणांत त्याचा अंत झाला. ‘ई१९०’ हे विमान डेन्मार्ककडे उड्डाण घेण्यासाठी धावपट्टीवर आले असताना ही घटना घडली.

या व्यक्तीची ओळख उघड करण्यात आलेली नाही. तसेच तो कर्मचारी होता की प्रवासी हेसुद्धा स्पष्ट होऊ शकले नाही. या घटनेची चौकशी केली जात असल्याचे ‘केएलएम’ एअरलाइन्सने म्हटले आहे, तर नेदरलँड पोलिसही या प्रकरणाची चौकशी करत आहेत. हा अपघात होता की आत्महत्या, हे उशिरापर्यंत स्पष्ट होऊ शकले नाही.

या घटनेची माहिती मिळताच आपत्कालीन सेवेतील यंत्रणांनी विमानाकडे धाव घेतली. अग्निशमन दलाच्या गाड्या व रुग्णवाहिका तत्काळ घटनास्थळी दाखल झाल्या. ही घटना घडताना अनेकांनी पाहिल्याचे प्रवाशांनी सांगितले. सुमारे १०४ प्रवाशांची वाहतूक करणारे हे विमान डेन्मार्कमधील बिलंडसाठी दुपारी २:२५ वाजता उड्डाण करणार होते. या दुर्घटनेनंतर प्रवाशांना सुखरूप उतरवून विमान रद्द करण्यात आले, अशी माहिती डच लष्करी पोलिसांनी दिली. ‘केएलएम’चे हे विमान सिटीहॉपर म्हणून ओळखले जाते. हे डबल इंजिन विमान युरोपमधील लहान उड्डाणांसाठी वापरले जाते.

‘केएलएम’ एअरलाइन्सने या घटनेबद्दल दु:ख व्यक्त केले आहे. ‘शिफोल विमानतळावर आज एक भयावह घटना घडली. एका व्यक्तीचा चालू विमानाच्या इंजिनमध्ये अडकून दुर्दैवी अंत झाला. सध्या याबाबत तपास सुरू असून, लवकरच अधिक तपशील उघड केला जाईल’, असे कंपनीने निवेदनात म्हटले आहे. याशिवाय शिफोल विमानतळ आणि वैमानिकांच्या संघटनेनेदेखील या घटनेबाबत दु:ख व्यक्त केले आहे.