Aryan Khan: एनसीबीला कोर्टात बसला ‘हा’ धक्का; आर्यनच्या अंतरिम जामिनावर उद्या फैसला

मुंबई: क्रूझवरील ड्रग्ज पार्टी प्रकरणी अटकेत असलेला अभिनेता शाहरुख खान याचा मुलगा आर्यन खान याला आज मुंबईतील न्यायालयाने १४ दिवसांची न्यायालयीन कोठडी सुनावली आहे. त्याच्यासह अन्य आरोपींनाही १४ दिवसांची न्यायालयीन कोठडी देण्यात आली असून सर्व आरोपींनी लगेचच अंतरिम जामिनासाठी अर्ज केले आहेत. त्यावर उद्या सुनावणी होणार आहे. त्यामुळे आर्यनची जामिनावर सुटका होणार की नाही, हे आता उद्याच स्पष्ट होणार आहे. ( Aryan Khan Bail Plea Latest News )

वाचा: आर्यन खानला १४ दिवसांची न्यायालयीन कोठडी; NCBची ‘ती’ विनंती कोर्टाने फेटाळली

मुंबईजवळ समुद्रात कॉर्डेलिया क्रूझवर छापा टाकून एनसीबीने आर्यन खान, अरबाज मर्चंट, मूनमून धामेचा या तिघांसह आठ जणांना ताब्यात घेतले होते व नंतर या सर्वांवर अटकेची कारवाई करण्यात आली होती. शनिवारी (२ ऑक्टोबर ) ही कारवाई करण्यात आली होती. क्रूझवर ड्रग्ज पार्टी सुरू होती ती उधळतानाच मोठ्या प्रमाणात ड्रग्जही जप्त करण्यात आल्याचा दावा एनसीबीने केलेला आहे. ही कारवाई बोगस असल्याचा दावा करत राष्ट्रवादी काँग्रेसचे प्रवक्ते व मंत्री नवाब मलिक यांनी एनसीबीवर अनेक गंभीर आरोप केले असतानाच आज एनसीबीने कोठडीसाठी केलेल्या अर्जावर महत्त्वाची सुनावणी झाली. याकडे सर्वांचेच लक्ष लागले होते.

वाचा:‘त्या’ रात्री गोसावी व भानुशाली NCB कार्यालयात परत आले होते!; मलिक यांनी दिला पुरावा

एनसीबीला कोर्टात मोठा धक्का बसला. ड्रग्ज पुरवठ्याचा हा मोठा कट असल्याचे दिसत असल्याने आरोपींची एनसीबी कोठडी ११ ऑक्टोबरपर्यंत वाढवून देण्याची विनंती एनसीबीने केली होती. मात्र ही विनंती कोर्टाने फेटाळली व सर्वांची रवानगी १४ दिवसांसाठी न्यायालयीन कोठडीत केली. त्यानंतर आर्यनसह सर्वच आरोपींनी अंतरिम जामिनासाठी अर्ज सादर केले आहेत. या अर्जांवर एकत्रित सुनावणी उद्या सकाळी ११ वाजता होणार आहे. त्यामुळे आर्यनला न्यायालयीन कोठडीत १४ दिवस काढावे लागणार की अंतरिम जामीन मिळणार याचा फैसला आता उद्याच होणार आहे. आर्यन ३ ऑक्टोबरपासून एनसीबी कोठडीत आहे.

दरम्यान, कॉर्डेला क्रूझ ड्रग्ज पार्टी प्रकरणात अटकसत्र सुरूच आहे. या प्रकरणातील सतरावा आरोपी २२ वर्षीय अर्चित कुमारला आज न्यायालयाने दोन दिवसांची एनसीबी कोठडी सुनावली. आर्यन खान व त्याचा मित्र अरबाज मर्चंट या दोघांना अर्चितने अमलीपदार्थ पुरवल्याचा आरोप आहे. तो गांजा पुरवणारा दलाल असल्याचा दावा एनसीबीने न्यायालयात केला आहे.

एनसीबीची विनंती फेटाळली

ड्रग्ज पार्टी प्रकरणी अधिक चौकशीत मिळालेल्या तपशीलावरून ड्रग्ज पुरवठ्याचा मोठा कट असल्याचे दिसत आहे. त्यासाठी आर्यन खान, अरबाज मर्चंट व इतर सहा जणांची कोठडीतील अधिक चौकशी आवश्यक आहे. त्यामुळे या सर्वांच्या एनसीबी कोठडीत ११ ऑक्टोबरपर्यंत वाढ करावी, अशी विनंती एनसीबीतर्फे अतिरिक्त महान्यायअभिकर्ता अनिल सिंग यांची कोर्टात केली. ४ ऑक्टोबर रोजी या आठ जणांना एनसीबी कोठडी सुनावण्यात आली होती. त्यानंतर एनसीबीने तपासात प्रगती दाखवत क्रूझवरील पार्टी आयोजक व ड्रग्ज पुरवठादारांनाही ताब्यात घेतले आहे. आता ड्रग्ज प्रकरणाची पूर्ण साखळी स्पष्ट होणे आवश्यक आहे. म्हणूनच सर्व आरोपींची अधिक चौकशी करण्यासाठी कोठडी वाढवून द्यावी, असे सिंग यांनी न्यायालयात सांगितले. मात्र न्यायालयाने ही विनंती फेटाळली.

वाचा: ड्रग्ज पार्टी: मंत्री नवाब मलिक यांचा ‘तो’ आरोप एनसीबीने फेटाळला