शिंदेसेनेची पत वाढली, मोदी सरकारमध्ये जास्त खात्यांची मागणी; कोणाकोणाची वर्णी? ४ नावं चर्चेत

नवी दिल्ली: लोकसभा निवडणुकीत राज्यात आणि देशभरात भारतीय जनता पक्षाच्या जागा घटल्यानं एनडीएतील लहान पक्षांचं महत्त्व वाढलं आहे. मित्रपक्षांच्या मदतीशिवाय सरकार स्थापन होऊ शकणार नसल्यानं एनडीएतील घटक पक्षांनी त्यांच्या मागण्या पुढे करण्यास सुरुवात केली आहे. राज्यात भाजपपेक्षा अधिक स्ट्राईक रेट राखल्यानं शिंदेसेनेचा भाव वधारला आहे.

२०१४ मध्ये सत्तेवर येण्यापूर्वी नरेंद्र मोदींनी मिनिमम गव्हर्मेंट मॅक्सिमम गव्हर्नमेंटचा नारा दिला होता. त्यावेळी भाजपनं स्वबळावर २७२ चा जादुई आकडा पार केला. २०१९ मध्येही भाजपनं बहुमत मिळवलं. त्यामुळे मोदींच्या मंत्रिमंडळात भाजपचाच बोलबाला राहिला. पण आता परिस्थिती बदलली आहे. भाजपला सरकार स्थापनेसाठी मित्रपक्षांची गरज असल्यानं घटक पक्षांनी महत्त्वाची खाती मागण्यास सुरुवात केली आहे. त्यामुळे यंदा मिनिमम गव्हर्मेंट मॅक्सिमम गव्हर्नमेंट नसेल. केंद्रात जम्बो मंत्रिमंडळ दिसेल.
Ramdas Athawale: भाजपकडून सत्ता स्थापनेची तयारी; ‘बिनसीट’ पाठिंबा देणाऱ्या आठवलेंची मोठी मागणी, RPIला काय हवं?
एनडीएतील छोट्या पक्षांचा विचार केल्यास शिंदेसेनेचा क्रमांक तिसरा लागतो. त्यांचे ७ खासदार आहेत. शिंदेसेना केंद्रात दोन कॅबिनेट मंत्रिपदांसाठी आग्रही आहे. बुलढाण्याचे खासदार प्रतापराव जाधव, मावळचे खासदार श्रीरंग बारणेंची नावं मंत्रिपदासाठी चर्चेत आहेत. जाधव सलग चौथ्यांदा लोकसभेवर गेले आहेत. यंदा निवडून येताना त्यांची चांगलीच दमछाक झाली. त्यांना केवळ ३१.५३ टक्के मतं मिळाली. मावळचे खासदार बारणे सलग तिसऱ्यांदा लोकसभेवर निवडून गेले आहेत.

मोदी सरकारमध्ये राज्यमंत्रिपदासाठी हातकणंगलेचे खासदार धैर्यशील माने, ठाण्याचे खासदार नरेश म्हस्के यांच्या नावाची चर्चा आहे. माने सलग दुसऱ्यांदा विजयी झाले आहेत. तर म्हस्केंनी पहिल्यांदाच लोकसभा गाठली आहे. ते मुख्यमंत्री एकनाथ शिंदेंचे निकटवर्तीय मानले जातात. मुख्यमंत्री शिंदेंचे पुत्र असलेले श्रीकांत शिंदे सलग तिसऱ्यांदा कल्याणमधून विजयी झाले. पण त्यांना मंत्रिपद मिळण्याची शक्यता नाही. विरोधकांकडून घराणेशाहीचा मुद्दा उपस्थित केला जाऊ शकतो. त्यामुळे श्रीकांत शिंदेंना मंत्रिमंडळात स्थान मिळण्याची शक्यता कमी आहे. शिंदेसेना मोदी सरकार ३.० मध्ये अवजड उद्योग, जहाजबांधणी, बंदरं, आरोग्य यासारख्या मंत्रालयांसाठी आग्रही आहे.