हसू मावळलं, डोळ्यात मळभ दाटलं, NDA च्या बैठकीत योगी आदित्यनाथांचे ‘बारा’ का वाजलेले?

नवी दिल्ली: देशाच्या संसदेत एनडीए संसदीय पक्षाची बैठक झाली. त्यात भाजप आणि मित्रपक्षांचे सर्व बडे नेते उपस्थित होते. काळजीवाहू पंतप्रधान नरेंद्र मोदी, अमित शहा आणि राजनाथ सिंह समोर मंचावर बसले होते. तर त्यांच्या समोर पहिल्याच रांगेत उत्तर प्रदेशचे मुख्यमंत्री योगी आदित्यनाथ बसले होते. त्यांच्या बाजूला मध्य प्रदेशचे मुख्यमंत्री मोहन यादव होते. यावेळी योगींच्या चेहऱ्यावरील हावभावांची सोशल मीडियावर चर्चा सुरू झाली आहे. नेत्यांच्या भाषणादरम्यान मुख्यमंत्री योगींच्या चेहऱ्यावर तणाव दिसून आला. उत्तर प्रदेशात भाजपच्या कामगिरीशी अत्यंत निराशाजनक राहिली, त्यामुळे योगी आदित्यनाथ तणावात असल्याची चर्चा सोशल मीडियावर सुरु झाली आहे.

मंचावरील नेत्यांच्या भाषणादरम्यान योगी गंभीर मुद्रेत दिसले. त्यांच्या शेजारी बसलेले इतर नेतेही निराश दिसत होते. २०१९ च्या तुलनेत युपीमध्ये भाजपची कामगिरी निराशाजनक होती, त्याचा परिणाम दिसून येत असल्याची चर्चा लोक करत आहेत. यावेळी भाजपने उत्तर प्रदेशात २९ जागा गमावल्या आहेत. अयोध्या असो की पूर्वांचल, प्रत्येक क्षेत्रात त्यांचे उमेदवार पराभूत झाले आहेत. अनेक केंद्रीय मंत्र्यांनाही आपली जागा वाचवण्यात अपयश आले. यामध्ये महेंद्रनाथ पांडे, साध्वी निरंजन ज्योती आदी नेत्यांच्या नावांचा समावेश आहे.

सोशल मीडियावर सर्वात मोठी चर्चा फैजाबाद मतदारसंघातील पराभवाची आहे. राम मंदिर बांधूनही अयोध्येतील जनतेने तिथे भाजप उमेदवाराला निवडले नाही, असे लोक म्हणत आहेत. विशेष म्हणजे, गेल्या काही वर्षांत सीएम योगी यांनी राम मंदिराच्या बांधकामासंदर्भात ८४ वेळा अयोध्येला भेट दिली आहे. पंतप्रधान नरेंद्र मोदीही अनेकवेळा अयोध्येला आले. येथे मोठा प्रचारही करण्यात आला. पण, त्याचा काही परिणाम निवडणुकीत दिसला नाही. सपाचे अवधेश प्रसाद यांनी भाजपचे उमेदवार लल्लू सिंह यांचा एक लाखांहून अधिक मतांनी पराभव केला.

बिहारचे मुख्यमंत्री आणि जेडीयू अध्यक्ष नितीश कुमार यांचे मंचावरून भाषण झाल्यानंतर योगी आदित्यनाथ यांच्या चेहऱ्यावरील भाव थोडेसे बदलले, पण नंतर ते पुन्हा पूर्वीसारखेच झाले. बिहारमध्ये नितीश कुमार यांच्या पक्षाने फक्त १२ जागा जिंकल्या आहेत.