पाकिस्तान एका अघोषित लष्करी कायद्याखाली ; माजी पाकिस्तानी प्रधानमंत्र्यांकडून न्यायालयात केजरीवालांच्या जामिनाचा उल्लेख

इस्लामाबाद : विविध गुन्ह्यांखाली अटकेत असलेले तहरीक-ए-इन्साफ पक्षाचे अध्यक्ष, पाकिस्तानचे माजी प्रधानमंत्री इमरान खान यांनी न्यायालयीन सुनावणी दरम्यान अरविंद केजरीवाल यांच्याबद्दलच्या खटल्याचा हवाला दिला आहे. पाकिस्तान सर्वोच्च न्यायालयात त्यांच्याविरोधात सुरु असलेल्या एका खटल्यात पाच सदस्यीय खंडपीठासमोर त्यांनी दिल्लीचे मुख्यमंत्री अरविंद केजरीवाल यांना भारताच्या सर्वोच्च न्यायालयाने निवडणूक कालावधीत दिलेल्या जामिनाचा उल्लेख केला. तसेच पाकिस्तान एका अघोषित लष्करी कायद्याखाली चालत असल्याबद्दल संताप व्यक्त केला.

पाकिस्तानी तुरुंगामध्ये माजी प्रधानमंत्र्यांसोबत गैरवर्तन

माजी प्रधानमंत्री खान हे २०२२ रोजी सत्तेतून पायउतार झाल्यापासून विविध गुन्ह्यांखाली शिक्षा भोगत आहेत. फेब्रुवारी महिन्यामध्ये झालेल्या ऐन निवडणुकांच्या पार्श्वभूमीवर निवडणुकांतून दूर ठेवण्यासाठी त्यांना पाच दिवसांमध्ये दोषी ठरवण्यात आल्याचा आरोपही त्यांनी केला. गुरुवारी पाकिस्तानी सर्वोच्च न्यायालयाचे मुख्य न्यायमूर्ती काझी फैज इसा यांच्या अध्यक्षतेखालील पाचसदस्यीस खंडपीठासमोर त्यांची सुनावनी पार पडली.या सुनावणी दरम्यान त्यांनी पाकिस्तानी तुरुंगामध्ये त्यांच्यासोबत झालेल्या गैरवर्तनाचाही उल्लेख केला.
Lok Sabha Election Result: निकाल भारतातील निवडणुकीचा अन् पाकिस्तानचा BP वाढला; मोदींच्या पराभवासाठी…

अरविंद केजरीवालांच्या जामिनाचा उल्लेख

सुनावणीदरम्यान खान यांनी दिल्ली मद्य घोटाळा प्रकरणी अटकेत असलेले दिल्लीचे मुख्यमंत्री अरविंद केजरीवाल यांना भारताच्या सर्वोच्च न्यायालयाने निवडणुकी दरम्यान पक्षाच्या प्रचारासाठी दिलेल्या जामिनाचा उल्लेख केला.तसेच आपण पाकिस्तान मध्ये एका अघोषित लष्करी कायद्याखाली दडपशाहीचा सामना करत असल्याबद्दल अस्वस्थता व्यक्त केली.न्यायमुर्तींनी इमरान खान यांची बाजू ऐकल्यानंतर एका मोठ्या राजकीय पक्षाचे नेतृत्व करत असलेल्या त्यांच्यासारख्या नेत्याला जेलमध्ये रहावे लागत असल्याबाबत सहानुभुती व्यक्त केल्याचे म्हटले जात आहे.

इमरान खान यांच्यावरील आरोप काय

माजी प्रधानमंत्री खान यांच्यावर भ्रष्टाचाराचे तसेच गोपनीय सरकारी माहिती उघड करुन राजकीय संबंधांना हानी पोहचवल्याचे आरोप आहेत.पाकिस्तानातील नॅशनल अकाउंटेबिलीटी कायद्यामधील (एनएओ) सुधारणांबाबत त्यांच्यावर हा खटला सुरु आहे. आम आदमी पक्षाचे प्रमुख व दिल्लीचे मुख्यमंत्री अरविंद केजरीवाल यांना २१ मार्च रोजी एका कथित मद्य घोटाळ्याप्रकरणी सक्तवसुली संचालनालयाने दिल्लीतून अटक केली होती. केजरीवाल यांनी ही अटक राजकीय हेतूने प्रेरीत असल्याचा आरोप केला होता .मे महिन्यामध्ये भारतातील सार्वत्रिक लोकसभा निवडणुकांच्या पार्श्वभूमीवर सर्वोच्च न्यायालयाकडून त्यांना निवडणूक प्रचारासाठी २ जून पर्यंत जामिन मंजूर करण्यात आला . राजकीय सूडबुद्धीने आपल्यावर अन्याय झाल्याचे सांगत खान यांनी अरविंद केजरीवाल यांच्या न्यायालयीन खटल्याचा संदर्भ दिला आहे.

तुरुंगातील गैरवर्तनाबद्दल बोलत असताना त्यांनी आपली तुलना पाकिस्तानचे माजी प्रधानमंत्री नवाज शरीफ यांच्या तुरुंगातील व्यवस्थेशी केली.त्यावेळी न्यायमूर्ती मंडोखेल यांनी विनोदी स्वरात त्यांना विचारले की ‘शरीफ सध्या जेल मध्ये नाहीत.ते जेल मध्ये जावेत असे तु्म्हाला वाटते का ?’. शरीफ यांनी तुरुंगातील गैरवर्तनाबद्दल केलेल्या आरोपांवर न्यायालयाने तुरुंगात अचानक भेट देण्यासाठी एका न्यायालयीन अधिकाऱ्याची नेमणूक करत असल्याचे सांगितले आहे.