PM Modi Oath Ceremony: नरेंद्र मोदी आज तिसऱ्यांचा घेणार पंतप्रधानपदाची शपथ; दिल्ली हाय अलर्टवर, ‘हे’ परदेशी पाहुणे राहणार उपस्थित

म. टा. विशेष प्रतिनिधी, नवी दिल्ली : राष्ट्रीय लोकशाही आघाडीचे (एनडीए) नेते पंतप्रधान नरेंद्र मोदी आज, रविवारी संध्याकाळी सव्वासात वाजता ऐतिहासिक राष्ट्रपती भवनाच्या प्रांगणात सलग तिसऱ्या वेळेस पंतप्रधानपदाची शपथ घेतील. शपथविधीच्या या भव्य सोहळ्यासाठी ५०० सीसीटीव्ही व निमलष्करी दलाच्या पाच कंपन्या या परिसरात तैनात असतील.

राष्ट्रपती भवनाच्या याच प्रांगणात सन २०१४ आणि सन २०१९मध्येही मोदी यांनी पंतप्रधानपदाची शपथ घेतली होती. मोदी यांच्यासोबत रविवारी एनडीएच्या १४ मित्रपक्षांचे किमान १८ खासदार मंत्रिपदाची शपथ घेण्याची शक्यता आहे. यापैकी सात कॅबिनेट मंत्री आणि उर्वरित ११ स्वतंत्र प्रभार आणि राज्यमंत्री असतील, असे कळते.

मालदीवचे राष्ट्रपती डॉ. महंमद मुईझ्झू यांच्यासह नेपाळ, मॉरिशस, सेशेल्स, भूतान, श्रीलंका व बांगलादेशाच्या राष्ट्रप्रमुखांना नरेंद्र मोदी यांच्या शपथविधी सोहळ्याचे निमंत्रण पाठविण्यात आले आहे.

राष्ट्रपती भवनाच्या प्रांगणात (कोर्ट यार्ड) भव्य सजावट करण्यात आली आहे. मोदी व अन्य मंत्री शपथ घेतील. त्यासाठी या प्रांगणात एक खास व्यासपीठ तयार करण्यात आले आहे. पाहुण्यांच्या स्वागतासाठी पुढच्या भागात लाल गालिचा (रेड कार्पेट) अंथरण्यात आला आहे. आठ हजारांहून अधिक पाहुण्यांसाठी आसन व्यवस्था करण्यात आली आहे.
Shrikant Shinde : श्रीकांत शिंदेंना कॅबिनेट मंत्रिपद द्या, शिवसेना खासदारांची मुख्यमंत्र्यांकडे एकमुखाने मागणी
या सोहळ्यासाठी भारताच्या ‘नेबरहुड पॉलिसी’ आणि ‘सागर’ व्हिजनअंतर्गत शेजारील देशांच्या नेत्यांना आमंत्रित करण्यात आले आहे. मात्र, पाकिस्तान, चीन आणि म्यानमार या शेजारी देशांना या समारंभासाठी आमंत्रित केलेले नाही. शेजारच्या देशांचे दोन राष्ट्रपती, एक उपराष्ट्रपती आणि चार पंतप्रधान मोदींच्या शपथविधीला उपस्थित राहणार आहेत.

हे राष्ट्रप्रमुख येणार

पंतप्रधान कार्यालयाच्या निवेदनानुसार श्रीलंकेचे अध्यक्ष रानिल विक्रमसिंघे, डॉ. मुईझ्झू, सेशेल्सचे उपाध्यक्ष अहमद अफिफ, बांगलादेशच्या पंतप्रधान शेख हसीना, मॉरिशसचे पंतप्रधान प्रवींदकुमार जगन्नाथ, नेपाळचे पंतप्रधान पुष्पकमल दहल ‘प्रचंड’ आणि भूतानचे पंतप्रधान शेरिंग तोबगे यांनी भारताचे निमंत्रण स्वीकारले आहे. पंतप्रधान शेख हसीना दिल्लीत पोहोचल्या आहेत. या विशेष अतिथींसाठी राष्ट्रपती द्रौपदी मुर्मू यांनी रविवारी संध्याकाळी मेजवानीचे आयोजन केले आहे.