मोदी ३.० मंत्र्यांचे खातेवाटप जाहीर, जाणून घ्या पंतप्रधान मोदींनी स्वतःकडे कोणती खाती ठेवली?

लोकसभा निवडणुकीचे २०२४ चे निकाल ४ जून रोजी घोषित झाले. यानंतर एनडीए सरकारची स्थापना झाली. काल रविवारी (०९ जून) पंतप्रधान नरेंद्र मोदी यांनी त्यांच्या सहकारी मंत्र्यांसह शपथ घेतली आहे. आता पंतप्रधान नरेंद्र मोदी यांनी त्यांच्या मंत्रिमंडळांमध्ये विभागांची विभागणी केली आहे. राष्ट्रपती भवनाच्या सचिवालयाने मंत्र्यांच्या विभागांची यादी जाहीर केली आहे. नव्या मोदी मंत्रिमंडळाच्या पहिल्या बैठकीत सर्व मंत्र्यांना त्यांच्या खात्यांचे वाटप करण्यात आले. ज्यामध्ये वरिष्ठ मंत्र्यांच्या खात्यांमध्ये कोणताही बदल करण्यात आलेला नाही.
Modi Cabinet 2024 Ministers and Portfolios: मोदी सरकार ३.० सरकारमधील खाते वाटप जाहीर, एका क्लिकवर संपूर्ण यादी
तर पंतप्रधान नरेंद्र मोदींनी अनेक मंत्रालये स्वत:कडे ठेवली आहेत. कार्मिक मंत्रालय, सार्वजनिक तक्रार आणि निवृत्ती वेतन, अणुऊर्जा विभाग आणि अंतराळ विभाग पंतप्रधान मोदींच्या अखत्यारीत राहतील. याशिवाय कोणत्याही मंत्र्याला न दिलेली सर्व मंत्रालये केवळ पंतप्रधान मोदींकडेच राहतील. याशिवाय सर्व महत्त्वाचे धोरणात्मक मुद्देही त्यांच्या हाताखाली राहतील. विशेष बाब म्हणजे डॉ. जितेंद्र सिंह पीएम मोदींसोबत विज्ञान आणि तंत्रज्ञान मंत्रालयाचे राज्यमंत्री (स्वतंत्र प्रभार), भूविज्ञान मंत्रालयाचे राज्यमंत्री (स्वतंत्र प्रभार), पंतप्रधानांचे राज्यमंत्री म्हणून काम करतील. मंत्री कार्यालय, कार्मिक, सार्वजनिक तक्रारी आणि निवृत्तीवेतन मंत्रालयात राज्यमंत्री, अणुऊर्जा विभागातील राज्यमंत्री आणि अंतराळ विभागातील राज्यमंत्री अशी जबाबदारी देण्यात आली आहे. यामध्ये बहुतांश विभाग असे आहेत की, ज्याची जबाबदारी पीएम मोदींनी स्वत:कडे ठेवली आहे.

याआधीच्या मंत्रिमंडळातील सर्व प्रमुख मंत्री याच खात्यांमध्ये कार्यरत राहणार आहेत. मोदी ३.० मध्येही राजनाथ सिंह संरक्षण मंत्री, अमित शहा गृहमंत्री, नितीन गडकरी रस्ते वाहतूक मंत्री, एस जयशंकर परराष्ट्र मंत्री आणि निर्मला सीतारामन अर्थमंत्री राहतील. तर मध्य प्रदेशचे माजी मुख्यमंत्री शिवराज सिंह चौहान यांच्याकडे कृषी आणि शेतकरी कल्याण आणि ग्रामीण विकास मंत्रालयाची जबाबदारी सोपवण्यात आली आहे. तर मनोहर लाल खट्टर यांच्याकडे ऊर्जा आणि शहरी विकास मंत्रालय देण्यात आले आहे.