Crime News: ट्रेनमध्ये पिशवीत महिलेचे हात-पाय, दोन नावांचा टॅटू, इंदूरमधील हत्येशी संबंध, गूढ वाढतंच

ऋषिकेश: योगनगरी म्हणून ओळखल्या जाणाऱ्या ऋषिकेशमध्ये एक भयंकर घटना उघडकीस आली आहे. येथे उज्जैनहून ऋषिकेशला जाणाऱ्या रेल्वे गाडीच्या डब्यात एका महिलेले कापलेले हात-पाय सापडल्याने एकच खळबळ उडाली आहे. गाडीच्या डब्यात असलेल्या पॉलिथिनच्या पाकिटात या महिलेचे हात-पाय सापडून आले आहेत. त्यामुळे रेल्वे स्थानकावर एकच गोंधळ उडाला.

घटना उघडकीस येताच रेल्वे पोलिसांनी तत्काळ वरिष्ठांना कळवलं. ९ मे रोजी इंदूरमध्ये एका महिलेचे धड सापडले होते. सापडलेल्या हात-पायांचा त्या घटनेशी संबंध असू शकतो. त्यानुसार, ऋषिकेश रेल्वे पोलिसांकडून इंदूर पोलिसांशी संपर्क साधला जात आहे.

मिळालेल्या माहितीनुसार, उज्जैन एक्स्प्रेस गाडी काल संध्याकाळी उशिरा ऋषिकेश स्थानकावर पोहोचली होती. सर्व प्रवासी उतरल्यानंतर ट्रेनला स्वच्छतेसाठी वॉशिंग लाइनवर नेण्यात आलं. दरम्यान, ट्रेनची साफसफाई करताना कर्मचाऱ्यांना एस-१ आणि एस-२ या स्लीपर कोचमध्ये दोन पिशव्या आढळून आल्या. या पिशव्यांमधून खूप दुर्गंधी येत होती. जेव्हा कर्मचाऱ्यांनी या पिशव्या उघडून पाहिल्या तेव्हा त्यांच्या पायाखालची जमीनच सरकली.

बॅग उघडून बघितलं असता त्यामध्ये एका महिलेले कापलेले हात आणि पाय दिसून आले. घटनास्थळी उपस्थित कर्मचाऱ्यांमध्ये एकच घबराट निर्माण झाली. याची माहिती तात्काळ रेल्वे पोलिस आणि वरिष्ठ अधिकाऱ्यांना देण्यात आली.

मीरा बेन असं हत्या करण्यात आलेल्या महिलेचं नाव असल्याची माहिती आहे. या महिलेच्या हातावर तिचं नाव मीरा बेन आणि गोपाल भाई असं लिहिलेलं आढळून आलं आहे.