Naveen Patnaik: नवीन पटनायकांचे ‘वर्क फॉर्म होम’ ठरतेय भाजपसाठी डोकेदुखी; राज्यात नव्या मुख्यमंत्र्यांसाठी घरच नाही

भुवनेश्वर: नुकत्याच झालेल्या लोकसभा निवडणुकीसोबत चार राज्यात विधानसभेच्या निवडणुका पार पडल्या. यात ओडिसाचा देखील समावेश होता. राज्यात केल्या २४ वर्षापासून बिजू जनता दलाची सत्ता होती. यावेळी मात्र भाजपने १४७ पैकी ७८ जागांवर विजय मिळवत बीजेडीकडून सत्ता काढून घेतली. राज्यातील या सत्तातरानंतर एक मोठा प्रश्न निर्माण झाला आहे.

राज्यात नव्या मुख्यमंत्र्यांसोबत त्यांच्यासाठीच्या निवासस्थानाचा देखील शोध सुरू आहे. पायउतार होणारे मुख्यमंत्री नवीन पटनायक गेल्या २४ वर्षांपासून या पदावर होते आणि ते इतक्या वर्षांपासून त्यांच्या खासगी घरातून मुख्यमंत्रीपदाचा कारभार पाहत होते. ओडीसामध्ये गेल्या २४ वर्षापासून मुख्यमंत्र्यांसाठी अधिकृत असे सरकारी निवासस्थान नाही. पटनायक हे त्यांच्या खासगी घरातून कारभार करत आहेत.

पटनायक यांनी २००० साली मुख्यमंत्रीपदाची शपथ घेतली आणि तेव्हापासून ते सरकारने दिलेल्या घरातून नव्हे तर ‘वर्क फॉर्म होम’ करत आहेत. त्यांच्या या निर्णयाने राज्याच्या राजकीय इतिहासात अनोखा आदर्श घालून दिला. नवीन निवास हे पटनायक यांचे घर जे त्यांचे वडील बिजू पटनायक यांनी बांधले होते तेथून गेल्या २४ वर्षापासून मुख्यमंत्र्यांचे प्रशासकीय काम चालत होते.

पटनायक यांना भारताच्या राजकीय इतिहासात सर्वाधिक काळ मुख्यमंत्री राहण्याचा विक्रम मोडण्यासाठी फक्त एक महिन्याचा कालावाधी कमी पडला.

राज्यात आता भाजपच्या नव्या मुख्यमंत्र्यांची लवकरच घोषणा होणार असल्याने त्यांच्यासाठी नवे सरकारी निवासस्थान शोधण्याचे प्रयत्न जोरात सुरू झाले आहेत. एका वरिष्ठ सरकारी अधिकाऱ्याने नमूद केले की, सध्याच्या मुख्यमंत्री तक्रार कक्षासह अनेक रिकाम्या जागा निवडल्या गेल्या आहेत.मात्र तेथे तातडीने स्थलांतर होणार नाही. एकदा जागा निवडल्यानंतर आवश्यक नूतनीकरण आणि अन्य गोष्टींची सोय केली जाईल. दरम्यान, राज्य प्रशासन नवीन मुख्यमंत्र्यांसाठी राज्य अतिथीगृहात तात्पुरता निवास म्हणून एक सुट तयार करत आहे.
Modi Cabinet 2024 Ministers and Portfolios: मोदी सरकार ३.० सरकारमधील खाते वाटप जाहीर, एका क्लिकवर संपूर्ण यादी

हेमानंद बिस्वाल आणि जानकी बल्लभ पटनायक यांसारखे माजी मुख्यमंत्र्यांनी भुवनेश्वर क्लबजवळील एका मजली इमारतीतून काम केले होते. 1995 मध्ये जेबी पटनायक पुन्हा निवडून आल्यानंतर कार्यालय दुमजली इमारतीत स्थलांतरित करण्यात आले. आता तेथे मुख्यमंत्री तक्रार कक्ष आहे. ही इमारत गिरीधर गमंग यांचे अधिकृत निवासस्थान म्हणूनही कार्यरत होती.

पटनायक कुटुंबाचा मूळ बंगला कटकमध्ये आहे जिथे बिजू पटनायक यांची मुले – प्रेम, गीता आणि नवीन – यांचा जन्म झाला. गेल्या पाच दशकांपासून आनंद भवन नावाचा बंगला केअरटेकरद्वारे संभाळला जात आहे.बिजू पटनायक यांच्याकडे नवी दिल्लीतील औरंगजेब रोडवर एक घर आहे. येथे ते कुटुंबासह राहतात

ओडिशाच्या विधानसभा निवडणुकीत पटनायक यांच्या २४ वर्षांच्या राजवटीचा अंत झाला. 147 सदस्यांच्या विधानसभेत भाजपने 78 जागा मिळवल्या. बीजेडीने 51 जागा जिंकल्या, तर काँग्रेसने 14 जागा घेतल्या आणि तीन अपक्ष उमेदवारांकडे गेल्या. विधानसभे सोबत लोकसभा निवडणुकीत बीजेडीला पराभवाचा सामना करावा लागला. राज्यात भाजपने २१ पैकी २० जागा जिंकल्या, तर काँग्रेसला एक जागा मिळाली.

भाजपच्या नव्या सरकारचा उद्या संध्याकाळी ५ वाजता शपथविधी होणार आहे. पंतप्रधान नरेंद्र मोदी दुपारी 2.30 वाजता भुवनेश्वरला पोहोचणार आहेत. विमानतळावरून ते राजभवनाकडे रवाना होतील आणि नंतर जनता मैदानावर संध्याकाळी ५ वाजता शपथविधीला उपस्थित राहतील.