Shakti Scheme : महिला प्रवाशांचे ‘जाऊ बाई जोरात’, मोफत बस प्रवासाला महिलांचा उत्स्फूर्त प्रतिसाद

वृत्तसंस्था, बेंगळुरू : कर्नाटकात काँग्रेस सरकारने लागू केलेल्या ‘शक्ती हमी’तील महिलांच्या मोफत बसप्रवासाच्या वर्षभरात २२७ कोटी फेऱ्या झाल्या आहेत. या योजनेमुळे राज्य सरकारच्या तिजोरीवर पाच हजार ५२६ कोटी ६४ लाख रुपयांचा बोझा पडल्याचे कर्नाटकचे परिवहन मंत्री रामलिंग रेड्डी यांनी शुक्रवारी सांगितले.गेल्या वर्षी झालेल्या कर्नाटक विधानसभेच्या निवडणुकीत काँग्रेसने विजय मिळवला होता. त्यामध्ये पाच हमी जाहीर केल्या होत्या, त्यामध्ये महिलांना मोफत बसप्रवासाची हमी सर्वांत महत्त्वाची होती, असे मानले जाते. सत्तेवर आल्यानंतर गेल्या वर्षी ११ जून रोजी मोफत बस प्रवास योजनेला सुरुवात झाली. यामध्ये राज्यातील महिलांनी आतापर्यंत २२६.९५ कोटी वेळा मोफत प्रवासाचा लाभ घेतला आहे.

२२६.९५ कोटी

कर्नाटकात ‘शक्ती’ योजनेत महिलांनी घेतलेला लाभ

~ ५,५२६.६४ कोटी

‘शक्ती’ योजनेवर सरकारने वर्षभरात केलेला खर्च

७१.४५ कोटी

बेंगळुरू महानगर परिवहनच्या बससेवेतील मोफत बसप्रवासाची संख्या

चारही कंपन्यांमध्ये लाभ

बससेवा मोफत बसप्रवासाची संख्या सरकारला आलेला खर्च (रुपये)

बेंगळुरू महानगर बससेवा ७१.४५ कोटी ९३७.०१ कोटी

केएसआरटीसी ६९.५ कोटी २१११.१४ कोटी

एनडब्ल्यूकेआरटीसी ५२.१२ कोटी १३५२.६८ कोटी

केकेआरटीसी ३३.४७ कोटी ११२५.८१ कोटी

बससेवा सुधारण्यासाठी पावले

– बससेवा सुधारण्यासाठी चारही सेवांमध्ये ५८०० नव्या बस दाखल होणार आहेत. त्यातील २४३८ बस दाखलही झाल्या आहेत.

– पल्लक्की, अश्वमेध क्लासिक, कल्याण रथ, अमोघ वर्षा अशा नव्या प्रकारातील बस प्रवाशांच्या सेवेत आल्या आहेत.

– चालक, वाहकांसह एकूण ९००० कर्मचाऱ्यांच्या भरतीला मंजुरी देण्यात आली आहे.

– प्रवाशांसाठी दहा लाख रुपयांपर्यंतचा विमा उतरवण्यात आला आहे.