हातात तीव्र वेदना, नितीश कुमारांची प्रकृती बिघडली, पाटण्याच्या रुग्णालयात उपचार सुरु

पाटणा: बिहारचे मुख्यमंत्री नितीश कुमार यांना शनिवारी सकाळी अचानक प्रकृती अस्वास्थ्यामुळे रुग्णालयात दाखल करण्यात आले आहे. सकाळी उठल्यानंतर त्यांनी हातामध्ये तीव्र वेदना होत असल्याची तक्रार केली. वेदना वाढल्याने त्यांना पाटण्यातील मेदांता रुग्णालयात नेण्यात आले, अशी माहिती देण्यात आली आहे.

डॉक्टरांनी दिलेल्या माहितीनुसार, नितीश कुमार यांच्यावर मेदांता येथील ऑर्थोपेडिक विभागात उपचार सुरू आहेत. डॉक्टरांचे एक पथक त्यांची काळजी घेत आहे. गेल्या काही महिन्यांपासून नितीशकुमार खूप व्यस्त होते. लोकसभा निवडणुकीदरम्यान महिनाभर निवडणूक प्रचार सुरू होता आणि त्यानंतर केंद्र सरकार स्थापनेबाबत दिल्लीत बैठका सुरू होत्या.

याशिवाय जनता दल युनायटेड (JDU) च्या राष्ट्रीय कार्यकारिणीची बैठक २९ जून रोजी होणार आहे, ज्यामध्ये नितीश कुमार यांना राष्ट्रीय अध्यक्ष म्हणून उपस्थित राहणे अनिवार्य आहे. या महत्त्वाच्या बैठकीच्या पार्श्वभूमीवर नितीश कुमार यांनी आपल्या प्रकृतीची काळजी घेत तात्काळ रूग्णालय गाठले आणि स्वत: उपचार घेत असल्याचे मानले जात आहे.

याआधीही लोकसभा निवडणुकीच्या प्रचारादरम्यान मुख्यमंत्री नितीश कुमार आजारी पडले होते. यानंतर त्यांच्यावर उपचार करण्यात आले आणि तब्येत बरी झाल्यानंतर ते पुन्हा कामात सक्रिय झाले. निवडणुकीचे निकाल आल्यानंतर मुख्यमंत्री दिल्लीला गेले आणि सरकार स्थापनेसोबतच त्यांनी आपल्या पक्षातील दोन नेत्यांची मंत्रिमंडळात नियुक्ती केली.

शुक्रवारी (१४ जून) नितीश कुमार यांच्या नेतृत्त्वात तीन महिन्यांनंतर मंत्रिमंडळाची बैठक झाली. या बैठकीत सरकारी कर्मचाऱ्यांचा बेरोजगार भत्ता, घरबांधणी भत्ता अशा २५ महत्त्वाच्या मुद्द्यांवर चर्चा करून निर्णय घेण्यात आले.