गुजरातमध्ये प्रत्येकी नोकरीसाठी ३.२ कोटी रुपयांची सबसिडी, मोदींच्या मंत्र्यांचं गुजरात सरकारच्या कारभारावर प्रश्नचिन्ह

नवी दिल्ली : केंद्रीय अवजड उद्योग मंत्री आणि जेडीएस नेते एचडी कुमारस्वामी यांनी शुक्रवारी रोजगार, नोकरी या प्रश्नांवर चर्चा करताना गुजरातमधील अमेरिकन मॅन्युफॅक्चरिंग कंपनीवर प्रश्न उपस्थित केला. ते म्हणाले, गुजरातमध्ये २.५ अब्ज डॉरल युनिटची स्थापना करणाऱ्या अमेरिकन सेमीकंडक्टर निर्माता मायक्रोन टेक्नॉलॉजीसारख्या कंपन्यांकडून भारताला गुंतवणुकीची गरज आहे का? ही कंपनी गुजरातमध्ये निर्माण होणाऱ्या प्रत्येक नोकरीसाठी ३.२ कोटी रुपयांची सबसिडी घेत आहे. कर्नाटकमधील पक्ष कार्यकर्त्यांना टेलिव्हिजनवर प्रसारित केलेल्या थेट भाषणात कंपनीची ओळख पटल्यानंतर त्यांनी हे विधान केलं.

अधिकाऱ्यांना सवाल, इतकं बजेट देणं किती योग्य?

कुमारस्वामी मोदी सरकार ३.० मध्ये मंत्री झाल्यानंतर शुक्रवारी बेंगळुरूमध्ये पोहोचले होते. त्यांनी यावेळी बोलताना सांगितलं, की नव्या उत्पादन यूनिटद्वारे जवळपास ५ हजार नोकऱ्या निर्माण होतील. त्यासाठी आपण त्यांना २ अब्ज डॉलर्सची सबसिडी देत आहोत. हे कंपनीच्या एकूण गुंतवणुकीच्या ७० टक्के आहे. यावर बोलताना कुमारस्वामी यांनी अधिकाऱ्यांना त्यांना इतकं बजेट देणं किती योग्य आहे, असा सवाल केला.

पुढे ते म्हणाले, दुसरीकडे छोटे उद्योग आहेत. उदाहरणार्थ, पीनेया (बेंगळुरूमधील औद्योगिक क्षेत्र) इथे छोटे उद्योग आहेत. त्यांनी किती लाख रोजगार निर्माण केले? आपण त्यांना कोणते फायदे दिले आहेत? देशाच्या संपत्तीचे रक्षण कसं करता येईल याचा विचार मी करतो आहे.
Giorgia Meloni : भारतात मोदी, तर इटलीत मुस्लिमांना जॉर्जिया मेलोनी यांचं नाव घेऊन भीती दाखवली जाते

तरुणांना रोजगार देण्यावर भर असणार

पंतप्रधान मोदींच्या मंत्रिमंडळात अवजड उद्योग मंत्रालय एचडी कुमारस्वामी यांच्याकडे सोपावण्यात आलं. मंत्रीपद मिळाल्यानंतर कुमारस्वामी यांनी नरेंद्र मोदींचे आभार मानले. रोजगाराबाबत बोलताना ते म्हणाले, देशातील तरुणांसाठी रोजगाराच्या संधी निर्माण करण्यावर भर असेल. राज्याबाहेरही नोकरीच्या संधी उपलब्ध करून देऊ शकतो. त्यासाठी दुसऱ्या राज्यात जाण्याची तयारी ठेवावी लागेल.

हमीभाव योजनांसाठी काँग्रेसवर निशाणा

कुमारस्वामी यांनी कर्नाटकातील काँग्रेसच्या हमीभाव योजनांवरही टीका केली. ते म्हणाले, लोकांना मोफत गोष्टींवर अवलंबून ठेवण्याऐवजी त्यांना रोजगार देऊन आत्मनिर्भर होण्यासाठी चालना देण्यावर त्यांचा विश्वास आहे.