शेतात काम करताना हात कापला, जखमी अवस्थेत रस्त्यावर सोडलं, इटलीत भारतीय मजुराचा तडफडून मृत्यू

रोम: इटलीच्या लॅटिनामध्ये काम करणाऱ्या एका भारतीय मजुराचा दुर्दैवी मृत्यू झाला आहे. हा मजूर लॅटिनाच्या एका शेतात काम करताना जखमी झाला होता. इतर मजुरांनी आणि शेताच्या मालकाने त्याची मदत करण्याऐवजी त्याला रस्त्यावर सोडून दिलं. त्यामुळे त्याचा मृत्यू झाला. बुधवारी ही घटना घडल्याची माहिती आहे. या घटनेबाबत मंत्री मरीन कॅल्डेरोन यांनी शोक व्यक्त केला आणि म्हटलं की ही अत्यंत अमानवीय आहे. जबाबदार व्यक्तीला शिक्षा मिळेल, असंही त्यांनी सांगितलं आहे.

जखमी हातासह रस्त्यावर सोडलं

सतनाम सिंह असं या शेत मजुराचं नाव असल्याची माहिती आहे. तो सोमवारी लॅटिना येथे शेतात काम करत असताना तो जखमी झाला. यामध्ये त्याचा हात कापला गेला होता. त्याला रुग्णालयात नेण्याऐवजी सहकारी मजूर आणि मालकाने त्याला त्याच्या घराच्या जवळील रस्त्यावर सोडून दिलं. त्यानंतर त्याचा मृत्यू झाला. लॅटिना हा परिसर रोमच्या दक्षिण भागातील एक ग्रामीण क्षेत्र आहे. येथे हजारो भारतीय प्रवासी मजूर राहतात.

भारतीय दूतावासाकडून मदतीचे प्रयत्न सुरु

इटलीतील भारतीय दूतावासाने सांगितले की, ते स्थानिक अधिकाऱ्यांसोबत मिळून याप्रकरणी काम करत आहेत आणि सतनाम सिंह यांच्या कुटुंबापर्यंत पोहोचण्यासाठी आणि त्यांना मदत देण्यासाठी प्रयत्न केले जात आहेत.

भारतीय दूतावासाने एक्सवर सांगितले की, इटलीतील लॅटिना येथे एका भारतीय नागरिकाचा दुर्दैवी मृत्यू झाल्याची माहिती दूतावासाला मिळाली आहे. आम्ही स्थानिक अधिकाऱ्यांच्या संपर्कात आहोत. कुटुंबाशी संपर्क साधण्यासाठी आणि कॉन्सुलर मदत देण्यासाठी प्रयत्न सुरू आहेत.

सतनाम सिंह योग्य कायदेशीर कागदपत्रांशिवाय काम करत असल्याची माहिती आहे. त्यांच्या पत्नी आणि मित्रांना त्यांच्या मृत्यूची माहिती देण्यात आली असून एअर ॲम्ब्युलन्स पाठवण्यात आली आहे, असं पोलिसांनी सांगितलं आहे.