Tej Police Times
मुंबई: अभिनेत्री शर्वरी वाघ आणि अभिनेता अभय वर्मा यांच्या ‘मुंज्या’ सिनेमाचे बॉक्स ऑफिस कलेक्शन सर्वांनाच आश्चर्यचकित करते आहे. तिसऱ्या वीकेंडपर्यंत या सिनेमाने १०० कोटींचा टप्पा पार केला असून १०० कोटी क्लबमध्ये दणक्यात एन्ट्री केली. १७व्या दिवशी या चित्रपटाच्या ७.२० कोटींच्या कमाईनंतर देशभरात ८७.३१ कोटीचे नेट कलेक्शन केले. तर ग्रॉस बॉक्स ऑफिस कलेक्शन १०० कोटींच्या पार झाले आहे. हा सिनेमा कार्तिक आर्यनच्या ‘चंदू चॅम्पियन’वरही भारी पडला आहे. जाणून घ्या दोन्ही सिनेमांनी आतापर्यंत किती कोटींची कमाई केली…
किती झाली ‘मुंज्या’ची कमाई?
‘चंदू चॅम्पियन’च्या कमाईत घसरण
‘कल्की २८९८ एडी’ येऊन धडकणार
किती झाली ‘मुंज्या’ची कमाई?
आदित्य सरपोतदार दिग्दर्शित ‘मुंज्या’ बॉक्स ऑफिसवर थांबण्याचे नाव घेत नाही आहे. सिनेमाने पहिल्याच दिवशी ४ कोटींहून अधिक कमाई केली होती. आता तिसऱ्या आठवड्यातही चांगली कमाई सुरू आहे. पहिल्या आठवड्यात या चित्रपटाचे कलेक्शन ३६.५० कोटी होते, दुसऱ्या आठवड्यात कलेक्शन ३४.५० कोटी झाले होते. त्यानंतर पंधराव्या दिवशी सिनेमाने ३.३१ कोटी, सोळाव्या दिवशी ५.८० आणि १७व्या दिवशी ७.२० कोटी अशी कमाई केली. यानंतर ‘मुंज्या’चे नेट बॉक्स ऑफिस कलेक्शन ८७.३१ कोटी आणि ग्रॉस बॉक्स ऑफिस कलेक्शन १०३ कोटी झाले आहे.
Maddock Films या प्रोडक्शन हाऊस अंतर्गत बनलेल्या मुंज्याने १०० कोटींचा टप्पा ओलांडल्यानंतर त्यांच्या अधिकृत इन्स्टाग्राम पेजवरुन याबद्दल पोस्ट शेअर करण्यात आली आहे. प्रेक्षकांचे आभार मानत त्यांनी याबद्दल माहिती दिली. जवळपास २५-३० कोटींच्या बजेटमध्ये बनलेल्या ‘मुंज्या’ने १०० कोटींचा टप्पा पार केला आहे.
‘चंदू चॅम्पियन’च्या कमाईत घसरण
दरम्यान सध्या ‘मुंज्या’ने कार्तिक आर्यनच्या ‘चंदू चॅम्पियन’ला तगडी टक्कर दिली. या सिनेमाने रीलिजनंतर दहाव्या दिवशी (२३ जून) अर्थात दुसऱ्या रविवारी ६.५ कोटींची कमाई केली. यानंतर सिनेमाचे एकूण कलेक्शन ४९.२५ कोटींवर पोहोचले आहे. पहिल्या आठवड्याच्या कमाईनंतर दुसऱ्या आठवड्यात या चित्रपटाचे कलेक्शन काहीसे कमी होताना दिसू लागले आहे. मीडिया रिपोर्टनुसार या चित्रपटाचे बजेट १२० कोटी रुपये आहे.
‘कल्की २८९८ एडी’ येऊन धडकणार
‘मुंज्या’ आणि ‘चंदू चॅम्पियन’या दोन्ही चित्रपटांना ‘काँटे की टक्कर’ देण्यासाठी आणखी एक सिनेमा प्रेक्षकांच्या भेटीला येतो आहे. प्रभास, दीपिका पादुकोण, अमिताभ बच्चन आणि कमल हासन स्टारर ‘कल्की २८९८ एडी’ हा सिनेमा येत्या २७ जून रोजी प्रदर्शित होतो आहे. त्यामुळे ‘मुंज्या’ आणि ‘चंदू चॅम्पियन’चे शोदेखील कमी होऊ शकतात. अशावेळी या दोन्ही सिनेमांची काय परिस्थिती असेल हे पाहणे महत्त्वाचे ठरले.