Jammu-Kashmir :जम्मूतील दुहेरी हल्ल्यांमधील दहशतवाद्यांशी सुरक्षा दलांची चकमक, दोन दहशतवादी ठार

जम्मू काश्मीर : जम्मू-काश्मीर येथे सुरक्षा दलांशी झालेल्या चकमकीमध्ये दोन दहशतवादी ठार झाले. काश्मीर खोऱ्यात वाढत्या दहशतवादी घटनांवर सर्व सुरक्षा दलांकडून संयुक्त कारवाई सुरु आहे. दहशतवाद्यांना शोधून त्यांचे अड्डे उध्वस्त करण्याच्या कामात सुरक्षा दलांना गेल्या काही दिवसात चांगले यश येत आहे. याच कारवाई दरम्यान बुधवारी डोडा येथे सुरक्षादलांनी दोन दहशतवाद्यांना ठार केले.

जम्मू-काश्मीर मधील पोलीस उच्चाधिकाऱ्यांनी x या समाजमाध्यमावर याबाबतची माहिती दिली आहे. त्यांनी दिलेल्या माहितीनुसार जम्मू-काश्मीरमधील डोडा येथील गंडोह भागात बजाड या यावी सुरक्षा दलांच्या शोधमोहीमेदरम्यान सकाळी ९ वाजून ५० मिनिटांनी दहशतवाद्यांसोबत चकमक झाली. यावेळी दोन्ही बाजूकडून झालेल्या गोळीबारामध्ये दोन दहशतवाद्यांना कंठस्नान घालण्यात सुरक्षा दलांना यश आले. ही मोहीम जम्मू-काश्मीर पोलीस, सीआरपीएफ यांनी संयुक्तपणे राबविली होती. यावेळी दहशतवाद्यांकडून शस्त्रास्त्रे आणि दारुगोळा देखील हस्तगत करण्यात आला आहे.

दुहेरी हल्ल्यांमागील दहशतवाद्यांना कंठस्नान

११ जून व १२ जून रोजी पहाडी भागात दोन दहशतवादी हल्ले झाले होते. याविरोधात पोलीस आणि सीआरपीएफ यांनी या भागात मोठ्या प्रमाणावर नाकेबंदी करुन शोधमोहीम राबविली होती. ११ जून रोजी या भागातील छत्तरगल्ला या चेक पोस्टवर दहशतवाद्यांनी हल्ला घडवून आणला होता. त्यात ६ सुरक्षा जवान गंभीर जखमी झाले होते. यानंतर दुसऱ्या दिवशी गंडोह भागात झालेल्या गोळीबारामध्ये एक पोलीस गंभीर जखमी झाला होता.

या दुहेरी हल्ल्यानंतर सुरक्षा दलांनी दहशतवादविरोधी मोहीम राबविली होती. दहशतवाद्यांचा ठिकाणा सांगणाऱ्यास ५ लाखांचे बक्षिसही जाहीर केले होते. काश्मीर खोऱ्यातील गेल्या २० दिवसांपासून वाढलेल्या दहशतवादी घटनांना पायबंद घालण्यासाठी पंतप्रधान मोदी यांनी सर्व सुरक्षा दलांची एक उच्चस्तरीय बैठक घेतली होती. गृहमंत्री अमित शहा यांनीही उच्चस्तरीय बैठका घेवून या हल्ल्यांना रोखण्यासाठी दहशतवाद विरोधी मोहीमा वाढविण्यासंदर्भात आदेश दिले होते. त्यानंतर सुरक्षा दलांकडून मोठ्या प्रमाणावर दहशतवाद्यांच्या शोधमोहीमा राबविल्या जात आहेत. त्याअंतर्गत १९ जून रोजी सुरक्षा दलांनी बारामुल्ला येथे दोन दहशतवाद्यांचा खात्मा केला होता.