बिहारमध्ये पूल नव्हे, ‘पत्त्यांचे बंगले’; तीन वर्षांत १४ मोठ्या घटना, का कोसळताहेत पूल?

बिहार: बिहारमध्ये पूल कोसळण्याच्या घटनांचे सत्रच सुरू आहे. बांधकाम सुरू असलेले काही पूल कोसळल्याने पुलांच्या दर्जा निकृष्ट असल्याचा आरोप होत आहेत. तर काही पूल खिळखिळे झाले होते. जून महिन्यापासून छोटे-मोठे सुमारे १२ पूल कोसळले आहेत. पत्यांच्या बंगल्याप्रमाणे बिहारमध्ये पूल कोसळत आहेत. यामुळे बिहारमधील राष्ट्रीय जनता दल व भाजप सरकारवर विरोधकांनी भ्रष्टाचाराचा आरोप केला आहे. या घटनांचा आढावा.

– ४ जून २०२३ : भागलपूर येथे गंगा नदीच्या घाटावरील चार पदरी असलेला पूल कोसळला. या पुलासाठी १,७१० कोटी रुपये खर्च झाले होते. यापूर्वी एप्रिल २०२२ मध्येही या पुलाचा काही भाग कोसळला होता.
– जुलै २०२० : गोपालगंज जिल्ह्यात २६३ कोटी रुपये खर्चून आठ वर्षांत बांधलेल्या छपरा-सत्तरघाट पुलाचा बांधकामानंतर काही भाग २९ दिवसांतच कोसळला. मुसळधार पावसामुळे गंडक नदीचा प्रवाह वाढल्याने हा पूल कोसळल्याच सांगण्यात आले. मात्र, निकृष्ट बांधकामामुळे हा पूल कोसळला होता.
– ९ जून २०२२ : सहरसा जिल्ह्यात नऊ जून २०२२ मध्ये कोसी नदीच्या तटबंधीवरील पुलाचा काही भाग कोसळला होता. यात तीन मजूर जखमी झाले होते. सिमरी बख्तियारपूर परिसरात ही घटना घडली होती.
– २० मे २०२२ : राजधानी पाटणा येथे १८८४मध्ये बांधलेला १३६ वर्षे जुना ब्रिटिशकालीन पूल मुसळधार पावसामुळे २० मे २०२२ रोजी कोसळला. पाटण्यापासून २५ किलोमीटरवरील फातुआ उपनगरात हा पूल होता.
– १८ नोव्हेंबर २०२२ : बांधकाम सुरू असलेला नालंदा जिल्ह्यातील पूल कोसळून एक जण ठार झाला. वेना तालुक्यात या पुलाचे बांधकाम सुरू होते
– १६ जानेवारी २०२४ : दरभंगा जिल्ह्यातील लोखंडी पूल ट्रकच्या अतिरिक्त वजनामुळे कोसळला. कुशेश्वर अस्थान तालुक्यात सबोहर घाट येथे ही घटना घडली होती.
– १६ मे २०२४ : पूर्णिया जिल्ह्यात बांधकाम सुरू असलेला पूल जमीनदोस्त झाला. निकृष्ट दर्जाचे साहित्य वापरल्याने हा पूल कोसळल्याचा स्थानिकांचा आरोप.

– १९ मार्च २०२४ : सारण जिल्ह्यात ब्रिटिशकालीन पूल कोसळला होता. या दुर्घटनेत दोन जण जखमी झाले होते.
– १८ जून २०२४ : बाकरा नदीवरील अरारिया येथील पूल बारा कोटी रुपये खर्चून बांधलेला कोसळला. सन २०२१मध्ये बांधकाम सुरू झाल्यानंतर २०२३ला पुलाचे काम पूर्ण झाले होते.
– २२ जून २०२२ : सिवानमधील गंडक नदीवर पसरलेला अंदाजे ४० ते ४५ वर्षे जुना पूलही कोसळला. पुलाची अवस्था दयनीय झाली होती.
– २७ जून २०२४ : किशनगंज जिल्ह्यातील बहादूरगंज येथे २००९ साली बांधलेला पूल कोसळला. या पुलाची अवस्था अंत्यंत नाजूक होती. किमान २५ लाख रुपये खर्च करून ७० मीटरचा हा पूल बांधण्यात आला होता.
– २३ जून २०२४ : पूर्व चंपारण्य भागात दीड कोटी खर्च असलेला पूल बांधकाम सुरू असताना कोसळला. निष्काळजीपणाने बांधकाम केल्याने पूल कोसळल्याचा स्थानिकांचा आरोप.
– १ जुलै २०२४ : मुझफ्फरपूर जिल्ह्यातील औरई ब्लॉकमधील बागमती नदीवर तात्पुरत्या बांबूच्या पुलाचे नुकसान झाले. स्थानिकांच्या दाव्यानुसार, दरवर्षी ये-जा करण्यासाठी तात्पुरते हे पूल बांधले जातात. पावसाळ्यात ते खराब होतात.
– १३ जुलै २०२४ : सिवान जिल्ह्यातील महाराजगंजमधील सिंकदरपूर, देवरिया पंचायत व भिखाबंध येथे एका पाठोपाठ एक तीन पूल कोसळले.

का कोसळताहेत पूल?
– अनेक पुलांचे काम निकृष्ट दर्जाचे
– काही पूल जुने झाल्याने जमीनदोस्त
– पायाभूत सुविधांची सुरक्षा आणि देखभाल याकडे दुर्लक्ष
– नदीवरील पूल बांधताना तांत्रिक बाबींकडे काणाडोळा
– कारवाईत आतापर्यंत पंधरापेक्षा जास्त अभियंत्यांचे निलंबन
– बिहारमधील पुलांचे ऑडिट करण्याची राज्य सरकारची सूचना