वरळी स्पा हत्या प्रकरणात वाघमारेच्या गर्लफ्रेंडबाबत धक्कादायक माहिती समोर, रहस्य उलगडलं

मुंबई: वरळीत ५२ वर्षीय गुरु वाघमारेच्या हत्या प्रकरणात आता नवा ट्विस्ट आला आहे. याप्रकरणात त्याच्या गर्लफ्रेंडला अटक करण्यात आल्याची माहिती आहे. त्याची गर्लफ्रेंड मेरी जोसेफला वरळी पोलिसांनी अटक केली आहे. तिला गुरु वाघमारेच्या हत्येच्या प्लॅनिंगची माहिती होती, असा आरोप आहे.

बुधवारी पहाटे वरळी नाका परिसरात एका स्पामध्ये हत्या करण्यात आली, तेव्हा आरटीआय कार्यकर्ते आणि पोलीस खबरी गुरू वाघमारे यांच्यासोबत उपस्थित असलेल्या मेरी जोसेफला वरळी पोलिसांनी अटक केली आहे

गर्लफ्रेंडला कटाची माहिती होती, गुरुचं लोकेशन तिनेच आरोपींना सांगितलं होतं

पोलिसांनी सांगितले की, या महिलेला कटाची माहिती होती आणि तरीही तिने गुरु वाघमारेला सायनमधील पार्टीनंतर ज्या स्पामध्ये त्याच्या हत्येचा प्लॅन होता तिथे नेलं होतं. आरोपी जोसेफने गुरूचे लोकेशन हल्लेखोरांसोबत शेअर केले होते, अशीही माहिती आहे.
Mumbai Crime: शरीरावर २२ जणांच्या नावाचे टॅटू, यापैकीच एक खुनी; मुंबई स्पा हत्याकांडचं भयंकर गुपित उलगडलं
पोलिसांनी सांगितले की, त्यांनी शमशाद उर्फ सूरज या स्पामधील आणखी एक कर्मचारी यालाही अटक केली आहे कारण तो मारेकऱ्यांशी सतत संपर्कात होता. “आम्ही अजूनही आरोपींची चौकशी करत आहोत. इतर आरोपींची भूमिका समजल्यावर आम्ही त्यांना अटक करू. आमचा तपास योग्य दिशेने सुरु आहे”, असं एका पोलीस अधिकाऱ्याने सांगितलं.

त्या रात्री सॉफ्ट टच स्पामध्ये नेमकं काय घडलं?

वरळीतील सॉफ्ट टच स्पामध्ये १७ जुलैला गुरु वाघमारे याची हत्या करण्यात आली होती. त्यादिवशी गुरुचा वाढदिवस होता, त्याने आपली गर्लफ्रेंड आणि काही मित्रांसोबत एका सायनच्या बारमध्ये पार्टी केली. त्यानंतर ते सॉफ्ट टच स्पामध्ये आले. काहीवेळाने मित्र निघून गेले. गर्लफ्रेंड आणि गुरु वाघमारे स्पामध्ये होते.

तेव्हा तिथे दोघे आले आणि त्यांनी आधी वाघमारेच्या गर्लफ्रेंडला दुसऱ्या खोलीत नेलं आणि वाघमारेची हत्या केली. त्यासाठी मोहम्मद फिरोज अन्सारीला ६ लाख रुपयांची सुपारी देण्यात आली होती. याप्रकरणात फिरोज अन्सारी, स्पा मालक संतोष शेरेकर आणि साकिब अन्सारी यांना अटक करण्यात आली होती.