Tej Police Times, The first and leading Marathi news web portal of Maharashtra, provides the hard core news to Maharashtrians in their own language. It also has a varied programming mix having Politics, Sports, Entertainment news coverage
Sunil Tatkare : जयंत पाटलांच्या लाडकी ‘बायको’ योजनेच्या टीकेला सुनील तटकरे यांचं प्रत्युत्तर
नाशिक : राष्ट्रवादी कॉंग्रेस (शरदचंद्र पवार) पक्षाचे प्रदेशाध्यक्ष जयंत पाटील यांनी काही दिवसांपूर्वी नाशिक दौऱ्यावर असताना मुख्यमंत्री माझी लाडकी बहीण आणि लाडका भाऊ योजनेवरून राज्य सरकारवर जोरदार टीका केली होती. ”आता फक्त लाडकी बायको योजना आणायची बाकी आहे, ती पण सरकारने आणावी”. असं जयंत पाटील यांनी म्हंटलं होतं. याच टीकेला अजित पवार गटाचे नेते सुनील तटकरे यांनी प्रत्युत्तर दिलं आहे. सुनील तटकरे हे दोन दिवसीय नाशिक दौऱ्यावर आहेत.
आमच्यावर बोलण्याचा नैतिक अधिकार नाही
सुनील तटकरे यांनी जयंत पाटील यांच्यावर निशाणा साधला आहे. ते म्हणाले की, ”लाडकी बहीण ऐवजी लाडकी बायको योजना आणा असं म्हणणाऱ्या जयंत पाटील यांना आमच्यावर बोलण्याचा नैतिक अधिकार नाही”.
अजित पवारांची जनसन्मान यात्रा नाशिकमधून निघणार
सुनील तटकरे पुढे म्हणाले की, ”अर्थमंत्री अजित पवार यांनी राज्याच्या दहावा अर्थसंकल्प मांडला आहे. राज्याच्या अर्थकारणाला, सर्वांना विकास देणारा अर्थसंकल्प राज्याची स्थापना झाल्यानंतर पहिल्यांदाच मांडला गेला आहे. अजित पावर यांची जनसन्मान यात्रा आम्ही नाशिकमधून सुरू करत आहोत. या यात्रेला ऑगस्ट महिन्यापासून सुरवात होत आहे. माझी लाडकी बहीण योजना, मुख्यमंत्री अन्नपूर्णा योजना, मुख्यमंत्री बळीराजा योजना यांची माहिती या यात्रेतून देण्यात येणार आहे. शेतकऱ्यांचे प्रश्न आम्ही जाणून घेणार आहोत”.
धनंजय मुंडे कुठेही जाणार नाही
जयंत पाटील यांनी कृषी मंत्री धनंजय मुंडे यांच्याबद्दल एक खळबळजनक विधान केलं आहे. पंधरा वर्षांपूर्वी धनंजय मुंडे यांना राष्ट्रवादीत घेणे हा आमचा आत्मघातकी प्लॅन होता. यावर सुनील तटकरे यांनी आपली प्रतिक्रिया दिली आहे. ते म्हणाले की, ”धनंजय मुंडे हे कुठे जातील असं आम्हाला वाटत नाही, परंतु आत्मघाती वक्तव्य करणारे जयंत पाटील कुठल्या मार्गावर जात आहेत. हे त्यांना मला विचारायचं आहे”.
दरम्यान, जयंत पाटील यांनी धनंजय मुंडे यांच्याबद्दल केलेल्या विधानामुळे राजकीय वर्तुळात चर्चांना उधाण आलं आहे.