Tej Police Times
महेश पाटील, नंदुरबार : काही दिवसांपूर्वी बसमध्ये जागा मिळण्यासाठी खिडकीद्वारे चढताना खिडकीसह प्रवासी खाली पडण्याचा व्हिडिओ सोशल मीडिया व्हायरल झाला होता. ही घटना ताजी असतानाच बसमध्ये जागा मिळण्यासाठी शाळकरी मुलांचा एक व्हिडिओ समोर आला आहे. २७ जुलै रोजी सकाळी नंदुरबार शहरातील बस स्थानकात बस पकडण्यासाठी शाळकरी मुलांची धडपड सुरू होती. बसमध्ये चढण्यासाठी मुलांचा गोंधळ सुरू होता. त्यावेळी बसमध्ये जाण्यासाठी धडपण करणाऱ्या विद्यार्थ्यांपैकी एका विद्यार्थ्याचा पाय चाकाखाली आल्याची धक्कादायक घटना घडली. सुदैवाने विद्यार्थ्याला जास्त दुखापत झाली नाही.
नंदुरबार शहरात अनेक शाळा आणि महाविद्यालयीन असल्यामुळे परिसरातील मोठ्या प्रमाणात विद्यार्थी हे नंदुरबारमध्ये येत असतात. मात्र परत गावाकडे जाण्यासाठी बस उपलब्ध नसल्यामुळे विद्यार्थ्यांचा मोठा गोंधळ उडत असतो. त्यातच बसमध्ये जागा मिळवण्यासाठी विद्यार्थ्यांना जीव धोक्यात घालून बसमध्ये जागा मिळवावी लागत असते.
अशातच बसमध्ये जागा मिळवण्यासाठी शालेय विद्यार्थी बसच्या मागे धावत असतानाच त्यातील एक विद्यार्थी खाली पडला आणि थेट एसटीच्या मागील चाकात अडकला. त्याचा पाय बसमध्ये अडकल्याने त्या ठिकाणी एकच गोंधळ उडाला. मात्र ही गोष्ट वेळीच लक्षात आल्याने त्या विद्यार्थ्याला बाहेर काढण्यात आलं. बसमध्ये पाय अडकून तो मुलगा बसखाली आला होता. थोडक्यात त्या विद्यार्थ्यांचा जीव वाचला. ही गोष्ट लक्षात आली नसती तर शालेय विद्यार्थासोबत मोठा अनर्थ घडला असता. नंदुरबार तालुक्यातील उमर्दे खुर्दे येथील तो विद्यार्थी आहे. सुदैवाने विद्यार्थ्याला थोडीशी दुखापत झाली. मात्र त्याचा जीव वाचला.
दरम्यान, शनिवार असल्याने माध्यमिक विभागाची शाळा सकाळच्या सत्रात भरली होती. शाळा सुटल्यानंतर गावाकडे येण्यासाठी अकरा वाजता एक बस होती. त्यानंतर गावाकडे जाण्यासाठी जवळपास दीड तास बस नाही. तब्बल एक दीड तास वाट पाहावी लागली असती, त्यामुळेच विद्यार्थी एक बस आली की त्यामध्ये चढण्यासाठी मोठी धडपड करतात. विद्यार्थ्यांना जीव धोक्यात घालून बसमध्ये जागा मिळवण्यासाठी धावपळ करावी लागली.