Tej Police Times
पुण्यात पुन्हा हिट अँड रन, आलिशान कार स्कूल बसला धडकली, फोटो पाहून अंगावर काटा येईल
पुणे (पिंपरी ): पिंपरी-चिंचवड शहरामध्ये असणाऱ्या सायन्स पार्कसमोर स्कूल बस आणि आलिशान गाडीचा भीषण अपघात झाला आहे. ही दोन्ही वाहनं समोरासमोर एकमेकांना धडकली आहेत. या अपघातामध्ये दोन विद्यार्थी जखमी झाले असून अन्य १३ विद्यार्थी सुखरूप आहेत. या अपघातामुळे पिंपरी-चिंचवड शहरात एकच खळबळ उडाली होती.
स्कूल बस आणि कारची समोरासमोर धडक
याबाबत अधिक माहिती अशी की, आज सोमवारी दुपारी साडे बारा वाजताच्या सुमारास सायन्स पार्क समोर १५ विद्यार्थी असलेली स्कूल बस आणि समोरून येणाऱ्या आलिशान चारचाकीमध्ये समोरासमोर भीषण धडक झाली. या धडकेमुळे स्कूल बसमध्ये असणारे विद्यार्थी घाबरले होते. या अपघातात दोन विद्यार्थी जखमी झाले असून वेळेत सावधानता बाळगल्यामुळे मोठा अनर्थ टळला आहे. अपघातात स्लूक बसची समोरील काच पूर्ण फुटली, तर समोरील भागाचा चक्काचूर झाला. तर, समोरुन येऊन धडकलेल्या कारचंही मोठं नुसकान झालं आहे.
या अपघाताच्या घटनेनंतर विद्यार्थ्यांचे पालक घटनास्थळी दाखल झाले असून त्यांनी आपापल्या पाल्याला सुखरूप घरी नेले आहे. बसच्या चालकाला पिंपरी-चिंचवड पोलिसांनी ताब्यात घेतले आहे.
१५ विद्यार्थ्यांचा जीव मुठीत
ही स्कूल बस १५ विद्यार्थ्यांना घेऊन बीआरटीमार्गावर विरुद्ध दिशेने येत होती. त्याच दरम्यान, समोरुन आलेल्या एका आलिशान गाडीने बसला समोरुन जोरदार धडक दिल्याने हा अपघात घडल्याची माहिती आहे. अपघातानंतर बसचा चालक पिंपरी पोलिसांच्या ताब्यात असून, आलिशान गाडीचा चालक मात्र फरार झाला आहे. सध्या पिंपरी पोलीस त्याचा शोध घेत आहेत.
बस चालक आणि कार चालकाची चूक
बस चालक आणि कार चालक या दोघांच्या चुकीमुळे हा अपघात झाल्याची प्रथम दर्शनी माहिती समोर येत आहे. ही धडक एवढी भीषण होती की बसच्या धडकेने कारचे मोठे नुकसान झाले आहे. यामुळे पुण्यात पुन्हा एकदा भीषण अपघात झाला असून आता विद्यार्थ्यांची सुरक्षाही वाऱ्यावर असल्याचं दिसून येत आहे.