राज ठाकरेंवर टीका, मनसैनिकांच्या संतापाचा पारा चढला, मिटकरींची गाडी फोडली!​​

अकोला : राष्ट्रवादीचे आमदार अमोल मिटकरी यांनी मनसेप्रमुख राज ठाकरे यांना ‘सुपारीबाज नेते’ संबोधल्याने आक्रमक झालेल्या मनसे कार्यकर्त्यांनी त्यांची गाडी फोडली. अकोल्यातील शासकीय विश्रामगृहावर मिटकरी आले असताना चिडलेल्या मनसैनिकांनी मिटकरी यांच्या गाडीवर हल्ला केला. हल्ल्यानंतर मिटकरीही आक्रमक झाले असून जोपर्यंत मनसैनिकांवर गुन्हे दाखल होत नाही, तोपर्यंत मी शांत बसणार नाही, असे सांगत पोलीस स्टेशनमध्येच ठिय्या मांडला.

मनसेप्रमुख राज ठाकरे यांनी पुण्यातील पूरस्थितीवर भाष्य करताना अजित पवार पुण्यात नसूनही पुण्यातील धरणातून पाणी वाहिले, अशा शब्दांत डिवचले. त्यावर संतापलेल्या अमोल मिटकरी यांनी राज यांच्यावर तोफ डागली होती. राज ठाकरे यांचा उल्लेख थेट सुपारीबाज असा करीत टोल आणि भोंग्याचे आंदोलन फसलेल्या सुपारीबाजांनी अजित पवारांवर बोलू नये, असा पलटवार केला होता. मिटकरी यांच्या टीकेनंतर मनसैनिक कमालीचे आक्रमक झाले.
Raj Thackeray : वय नसताना सरकार वाकलंय, याला त्याला घेऊ नका; राज ठाकरेंचा चंद्रकांत पाटलांना सल्ला

मनसैनिकांच्या संतापाचा पारा चढला, मिटकरींची गाडी फोडली!

शेतकऱ्यांचे प्रश्न ऐकून घेण्याकरिता अमोल मिटकरी मंगळवारी अकोल्यातील शासकीय विश्रामगृहावर आले होते. त्यावेळी मनसैनिकांनी त्यांच्या गाडीला लक्ष्य केले. मिटकरींच्या गाडीच्या काचा फोडून राज ठाकरे यांच्यावरील टीकेचा संताप मनसैनिकांनी व्यक्त केला. या हल्ल्यात मिटकरी यांच्या गाडीचे बरेच नुकसान झाले.
Raj Thackeray : शर्मिला ठाकरे आणि अंबानी कुटुंब! राज ठाकरेंनी सांगितला परदेशातील ‘तो’ किस्सा

मागून हल्ला करणारे मर्द नसतात. आमच्याही कार्यकर्त्यांनी मनसैनिकांना सडेतोड उत्तर दिले आहे. महाराष्ट्रात काय मोगलाई लागली आहे काय? हल्ल्यासंदर्भात अकोला पोलीस अधिक्षकांशी माझे बोलणे झाले असून तत्काळ कारवाई व्हावी, अशी माझी मागणी आहे, असे अमोल मिटकरी यांनी सांगितले.
Pune Flood : महापालिका निवडणुकाच नाहीत, प्रशासनाशी कोण बोलणार? जबाबदारी कोणाची? राज ठाकरे यांनी सरकारला सुनावले

मी केलेल्या टीकेवर मनसैनिकांचा आक्षेप असेल तर त्यांनी माझ्याशी चर्चा करावी पण टीका रुचली नाही म्हणून थेट गाडीवर हल्ला करणे हे कोणत्या लोकशाहीत बसते? असा सवालही मिटकरी यांनी विचारला.

अमोल मिटकरी राज ठाकरेंबद्दल काय म्हणाले होते?

राज ठाकरे हे महाराष्ट्रातील सुपारीबहाद्दर नेते आहेत. टोलनाक्याचे आंदोलन असो वा भोंद्याचे आंदोलन असो, अशी त्यांची अनेक आंदोलने फसलेली आहेत. राज ठाकरेंना एनडीआरएफचा साधा लाँग फॉर्मही सांगता येत नाही, त्यांनी काय पूरस्थितीबद्दल बोलावे? राज ठाकरेंची विश्वासार्हता संपलेली आहे. महाराष्ट्रातील आतापर्यंतच्या राजकीय इतिहासात सर्वात अयशस्वी ठरलेल्या व्यक्तीने अजित पवार यांच्यावर बोलू नये, अशा शब्दात राज ठाकरे यांच्यावर मिटकरी यांनी टीका केली होती.