Tej Police Times
कोकणात जाणाऱ्यांसाठी आनंदाची बातमी, गणपतीसाठी आणखी २० फेऱ्या; कुठून, कधी आणि काय असणार वेळ?
महेश चेमटे, मुंबई : उत्सव काळातील गर्दी विभागण्यासाठी नव्या अतिरिक्त २० फेऱ्यांची घोषणा रेल्वे प्रशासनाने केली आहे. सध्या मध्य आणि कोकण रेल्वेवरून २०२ फेऱ्या तसंच पश्चिम आणि कोकण रेल्वेवरून ५६ फेऱ्यांची घोषणा करण्यात आली आहे. आणखी २० फेऱ्यांमुळे उत्सव काळात मध्य-कोकण-पश्चिम रेल्वेवरून धावणाऱ्या फेऱ्यांची संख्या २७८ पर्यंत पोहोचली आहे.
गणोशोत्सवासाठी आणखी २० फेऱ्या
गाडी क्रमांक ०१०३१/२ लोकमान्य टिळक टर्मिनस ते रत्नागिरी-लोकमान्य टिळक टर्मिनस (८ फेऱ्या)
गाडी क्रमांक ०१४४५/६ पुणे-रत्नागिरी-पुणे (२ फेऱ्या),
गाडी क्रमांक ०१४४१/२ पनवेल-रत्नागिरी-पनवेल (२ फेऱ्या),
गाडी क्रमांक ०१४४७/८पुणे-रत्नागिरी-पुणे ( ४ फेऱ्या),
गाडी क्रमांक ०१४४३/४ (४ फेऱ्या) अशा अतिरिक्त फेऱ्या कोकण आणि मध्य रेल्वेवर चालवण्यात येणार आहेत.
विशेष गाड्यांनाही पेण स्थानकात थांबा
प्रवाशांच्या सुविधेसाठी सर्व विशेष गाड्यांना पेण थांबा देण्यात येणार आहे, अशी माहिती रेल्वे अधिकाऱ्यांनी दिली आहे. गणेशोत्सवासाठी कोकण, मध्य आणि पश्चिम रेल्वेवरून नियमित आणि विशेष रेल्वेगाड्या धावत आहेत. पेणमध्ये प्रवासी संख्या सातत्याने वाढती आहे. मात्र रेल्वे प्रशासनाने अद्याप पेण स्थानकात थांबा दिलेला नाही. उत्सव काळात पेणमधील प्रवाशांच्या सुविधेसाठी १३ रेल्वे गाड्यांना थांबा न दिल्यास १० ऑगस्ट रोजी आंदोलन आणि रेल रोको करण्याचा इशारा रेल्वे प्रवासी संघटनांनी दिला होता. त्यानंतर आता पेणमध्येही या गाड्यांना थांबा देण्यात येणार आहे.
अनेक प्रवाशांसाठी पेण सोयीचं स्थानक
रत्नागिरी, सिंधुदुर्ग जिल्ह्यांतील अनेक कोकणवासी पेणला स्थायिक आहेत. त्याचबरोबर खोपोली, खालापूर, अलिबागला रत्नागिरीकडे जाण्यासाठी पेण हेच सर्वात जवळचं स्थानक आहे. पेणमध्ये शासकीय कार्यालयं, तंत्रनिकेतन आणि इतर खासगी कार्यालयं असल्यामुळे पेणला प्रवाशांची गर्दी असते. आजपर्यंत पेण दुर्लक्षित होतं. तेथील प्रवाशांनी आंदोलनाचं हत्यार उपसल्यामुळे रेल्वे प्रशासनाला नाईलाजाने हे थांबे द्यावे लागले. आता दिवा सावंतवाडी, मांडवी, नेत्रावती, नागपूर, मडगाव यांसारख्या नियमित गाड्यांचे थांबे मिळण्याची प्रतीक्षा आहे, असं पेणमधील प्रवाशांचे म्हणणे आहे.