मनोज जरांगेंविरुद्ध जारी केलेलं अटक वॉरंट रद्द, तरी कोर्टानं जरांगेंना सुनावलं, नेमकं प्रकरण काय?

पुणे :मनोज जरांगे पाटील यांना पुणे कोर्टाने मोठा दिलासा दिला आहे. मनोज जरांगे यांच्या विरोधातील अटक वॉरंट रद्द करण्यात आलं आहे. जरांगे पाटलांनी प्रयोगाचे पैसे न दिल्याप्रकरणी नाट्यनिर्मात्यानं जरांगेंविरोधात पोलिसांत धाव घेतली होती. २०१३ मध्ये या प्रकरणाची नोंद झाली आणि त्यानंतर पोलिसांनी आरोपपत्र दाखल केले होते. परंतु आता वैद्यकीय अहवालाच्या आधारे कोर्टाने जरांगेंना दिलासा दिला आहे.

मनोज जरांगे पाटील आणि त्यांच्या सहकाऱ्यांनी एका नाटकाच्या प्रयोगांचं आयोजन केलं होतं. या प्रयोगाचे नाट्य निर्मात्याला पूर्ण पैसे न दिल्याप्रकरणी संबंधित नाट्यनिर्मात्यानं कोथरुड पोलीस ठाण्यात गुन्हा दाखल केला होता आणि जून महिन्यात दोषारोपपत्र दाखल करण्यात आले होते. ज्याचा खटला सध्या पुणे कोर्टात सुरु आहे. पण याआधी त्यांनी वैद्यकीय अहवालाचा दाखला देऊन कोर्टात हजर राहिले नव्हते.
Shivsena UBT: जागावाटपाआधीच उमेदवारी; नाशकात ठाकरे गटाकडून दोन उमेदवार जाहीर, ‘मविआ’त ठिणगी पडणार?
मनोज जरांगे पाटील सातत्याने उपोषण करत असल्याने त्यांची प्रकृती खालावली होती. संभाजीनगर येथील गॅलॅक्सी रुग्णालयात त्यांच्यावर मूत्रपिंड विकारासंबंधित उपचार सुरु होते. त्यांना डॉक्टरांनी विश्रांतीचा सल्लाही दिला होता. त्यामुळे ते कोर्टात हजर राहू शकले नाहीत. त्यांनी कोर्टाला यासंदर्भत क्षमायाचिका सादर केली होती. दरम्यान त्यांना डॉक्टरांनी प्रवास टाळण्याचे सुचवले असल्याने मनोज जरांगे पाटील यांनी सुनावणीच्या वेळी रुग्णवाहिकेतून कोर्टात हजेरी लावली.

मनोज जरांगे पाटील कोर्टासमोर हजर झाले. यासाठी पाटील रात्री २ वाजता पुण्यात दाखल झाले होते. जरांगेंनी वैद्यकीय अहवालाच्या आधारावर कोर्टासमोर अटक वॉरंट रद्द करण्याची मागणी केली होती. कोर्टानेही वैद्यकीय अहवालांच्या आधारे अटक वॉरंट रद्द करुन मनोज जरांगे पाटील यांनी मोठा दिलासा दिला आहे.

न्यायालयाने जरांगेंना सुनावले

दरम्यान न्यायलयाबाबत व न्यायलायच्या पीठासीन अधिकाऱ्यांबाबत जरांगेंनी आक्षेपार्ह विधान केल्याची बाब सुनावणीवेळी निदर्शनास आणून दिली. आणि न्यायालयाचा पुन्हा अवमान केला जाऊ नये अशी सक्त ताकीद दिली आहे आणि यापुढे जरांगेंनी बोलताना काळजी घ्यावी असेही सुचवले आहे. तर या प्रकरणाची पुढील सुनावणी ३ सप्टेंबर रोजी होणार आहे.