लोहगडाच्या पायथ्याला भेगा, आता किल्ले तिकोनावर दरड कोसळली, गावकऱ्यांचा जीव धोक्यात

पुणे ( मावळ ): पुणे शहरासह जिल्ह्यामध्ये गेल्या चार दिवसांपासून मुसळधार पाऊस कोसळत आहे. या पार्श्वभूमीवर पुण्याला पावसाचा रेड अलर्ट देण्यात आला आहे. तर, संपूर्ण जिल्ह्यात मुसळधार पाऊस बरसत आहे. त्यामुळे प्रशासन अलर्टमोडवर आहे. अनेक भागात सतर्कतेच्या सूचना जारी करण्यात आल्या आहेत. तर, जिल्ह्यातील धरण क्षेत्रामध्ये पावसाचे प्रमाण अधिक आहे. त्यातच मावळ तालुक्यामध्ये देखील मोठ्या प्रमाणावर पाऊस पडत आहे.

मावळ तालुक्यातील प्रसिद्ध असलेला किल्ले तिकोनाचा काही भाग कोसळ्याची घटना समोर आली आहे. या घटनेने किल्ल्याच्या पायथ्याशी असलेल्या गावांना धोका निर्माण झाला आहे. आज सकाळी पावणे बाराच्या सुमारास ही घटना घडली आहे.
Pune Rain: पुण्यात मुसळधार, खडकवासलातून विसर्ग, पुन्हा पूरस्थिती; प्रशासन अलर्ट मोडवर, लष्करही तैनात

आधी लोहगडच्या पायथ्याला भेगा, आता किल्ले तिकोनावर दरड कोसळली

मावळ तालुक्यातील लोहगडाच्या पायथ्याला भेगा पडल्यानंतर आता किल्ले तिकोनाचा काही भाग कोसळला आहे. तिकोना किल्ल्याच्या पायथ्याशी तिकोनापेठ हे गाव आहे. या गावची लोकसंख्या ५०० हून अधिक आहे. आज सकाळी अकरा वाजून ४५ मिनिटांच्या सुमारास किल्ले तिकोना वरून दरड कोसळण्याचा आवाज इथे राहणाऱ्या ग्रामस्थांना आला. आवाज कसला झाला हे पाहण्यासाठी येथील ग्रामस्थ घरातून बाहेर पडले. त्यांना समोर तिकोना किल्ल्याचा काही भाग कोसळत असल्याचे त्यांनी प्रत्यक्षपणे पाहिले. किल्ले तिकोनाला वितंगगड असे देखील संबोधले जाते.

तिकोना गडावर पर्यटकांना बंदी

या किल्ल्यावरून छोटी दरड जरी कोसळली असली तरी येणाऱ्या काळामध्ये याचा मोठा धोका संभवू शकतो. त्यामुळे किल्ल्याच्या पायथ्याशी असणाऱ्या गावांना सतर्कतेचा इशारा देण्यात आला आहे. या घटनेनंतर गडावर जाण्यासाठी बंदी घालण्यात आली आहे. त्यामुळे तिकोना गडावर फिरायला येणाऱ्या पर्यटकांनी या गोष्टीची माहिती घेणे आवश्यक आहे.

गावकऱ्यांना सतर्क राहण्याच्या सूचना

पावसाची संततधार सुरू राहिली तर स्थानिक ग्रामस्थांनी सतर्क राहणे गरजेचे आहे. या संदर्भात प्रशासनाला कळविण्यात आले असून जिल्हा व स्थानिक प्रशासनाने ग्रामस्थांना सतर्क राहण्याच्या सूचना दिले आहेत.